Қордай ауданында ауыл қауіпсіздігін арттыру бағытында жүйелі жұмыстар жүргізілуде. Жамбыл облысында іске асырылып жатқан «Ауыл құтқарушылары» бағдарламасы шеңберінде Сортөбе ауылындағы ерікті өрт сөндіру бекеті жаңғыртудан өтті.
Жоба ауылдық жерлердегі төтенше жағдайлардың алдын алуға және өрт қауіпсіздігін қамтамасыз етуге бағытталған. Жаңғырту жұмыстары аясында Сортөбе ауылындағы өрт сөндіру бекетінің ғимаратына жөндеу жұмыстары жүргізіліп, материалдық-техникалық базасы жаңартылды. Сонымен қатар, заманауи өрт сөндіру техникасы мен жабдықтары жеткізіліп, қызметкерлердің жұмыс жағдайы жақсартылды.
Жобаның негізгі мақсаты – аудан орталығынан шалғай орналасқан ауылдық елді мекендерде төтенше жағдайларға жедел әрекет ету мүмкіндігін арттыру. Қауіп төнген жағдайда жедел ден қою – адам өмірін аман сақтап қалудың басты кепілі.
Жаңартылған бекет – тек техникалық тұрғыда ғана емес, қызмет тиімділігі жағынан да ауыл халқының сенімін арттырды. Жергілікті тұрғындар бұл бастаманы оң бағалап, қауіпсіздіктің күшеюі ауыл өмірі үшін маңызды екенін атап өтуде.
– Бұрын төтенше жағдай туындаса, ауданнан арнайы көліктің келуін күтуге тура келетін. Енді дайын өрт сөндіру бөлімшесі ауылдың өз ішінде болғандықтан, біз өзімізді әлдеқайда қауіпсіз сезінеміз, – дейді ауыл тұрғындары.
«Ауыл құтқарушылары» бағдарламасы – ауыл халқының қауіпсіздігін қамтамасыз ету бағытындағы маңызды жоба. Бұл бастама азаматтық қорғау жүйесін жетілдіруге, ауылдық инфрақұрылымды нығайтуға, сондай-ақ ауыл жастарын волонтерлік пен төтенше жағдайлар саласында қызмет етуге ынталандыруға бағытталған.
Бағдарлама аясындағы жұмыстар мұнымен шектелмейді. Жаңғырту жұмыстары Қордай ауданының басқа да елді мекендерінде жалғасатын болады. Осылайша, өрт қауіпсіздігін қамтамасыз ететін жергілікті құрылымдар біртіндеп жаңартылып, облыс бойынша бірыңғай жүйе қалыптастырылмақ.
