«ТАЗА ҚАЗАҚСТАН» НАУРЫЗНАМА ТҰЖЫРЫМДАМАСЫМЕН ҮНДЕСТІ
Соңғы уақытта Қордай ауылының инфрақұрылымын жаңарту жұмысына ерекше көңіл бөлініп келгеніне көпшілік куә. Ауылда қарапайым тұрғындардың қолайлығы үшін жасалған жаңа нысандар бой көтеріп, аудан орталығы жыл сайын көркейіп келеді. Қордайлықтардың ең сүйікті деген демалыс орны «Емен» саябағы жаңартылып, 17 наурыз күні қолданысқа берілді.
17 наурыз күні мәдениет нысанының ашылу салтанаты болып бекерге таңдалған жоқ, себебі бұл күні – Мемлекет басшысы Қасым-Жомарт Кемелұлы мақұлдаған Наурызнама тұжырымдамасында Мәдениет және ұлттық салт-дәстүр күні деп белгіленген. Сонымен қатар, жаңа саябақтағы балалар ойнайтын алаңдар, отбасымен серуендейтін жайлы орындар, спортпен шұғылданатын арнайы аймақтар сияқты жобалар – «Таза Қазақстан» акциясынан туындаған бастама екені белгілі.
Көктемнің шуақты күні көпшілік салтанатты іс-шараға жиналды. Күмбірлеген күйсандықтан шыққан әуен, керемет безендірілген саябақ – мерекеге ұлттық киімін киіп келген қордайлықтардың көңіл-күйін еселей түсті. Сонымен қатар, этно-мәдени бірлестіктер өкілдерінің қатысуымен көрме, қолөнер көрмесі, концерттік бағдарлама ұйымдастырылды.
Жаңартылған саябақта балалар ойын алаңы, спорттық жаттығуларға арналған құрылғылар, жаңа орындықтар орнатылып, отбасыларға арналған серуендеу аймақтары жасалды. Мұнда ауылдың табиғатымен үйлескен заманауи инфрақұрылым жасау мақсат етілгені байқалады. Аумақты көгалдандыру жұмысы жүргізіліп, алаңның ортасында субұрқақ, түнгі уақытта көрік беретін жарық шамдар және көрікті инсталяция орнатылды. Бұл шаралар экологиялық мәдениетті насихаттауға және ауыл тазалығын сақтауға бағытталған.
Ашылу салтанатына қатысқан аудан әкімі Бегзат Болатбеков ауыл тұрғындарын Ұлыстың Ұлы күні мейрамымен құттықтады.
— Саябақтың жаңартылуы – аудан тұрғындары үшін табиғатты аялау, туған жерге жанашырлық таныту, экологиялық мәдениетті дәріптеу жолындағы үлкен қадам болары сөзсіз. Баршаңызды осынау тамаша саябақтың қайта ашылуымен құттықтай отырып, зор денсаулық, жақсылық пен қуаныш тілеймін. Киелі Қордайымыз әрдайым жасыл желекке бөленіп, көркейе берсін! Келе жатқан Әз-Наурыз мерекесі әр шаңыраққа құт-береке мен баянды бақыт әкелсін! – деді аудан басшысы.
Жаңартылған саябақ мәдени шаралар өткізуге де ыңғайлы алаң болып табылады. Ол ауыл тұрғындарына табиғат аясында серуендеп, уақыттарын тиімді өткізуге мүмкіндік береді.
