Ардақты ағайын!
Құрметті жерлестер!
Сіздерді жаңару мен жақсылықтың, береке мен бірліктің жарқын мерекесі – Наурыз мейрамымен шын жүректен құттықтаймын!
Тарих тереңінен тамыр тартқан әз-Наурыз – халқымыз үшін қашанда ерекше мейрам. Көктемнің шуақты лебімен ілесіп, Жаңа жыл келеді деп қуанған жұрт бұл күнді ежелден жақсылықтың бастауы, берекенің белгісі санаған. Ата-бабамыз бар игі істерін дәл осы күні бастап, жаңа бастамаларға жол ашқан.
Наурыз – халқымыз үшін еңсесі биік елдіктің, болаттай берік бірліктің, ырыс пен молшылықтың, үміт пен сенімнің нышаны. Өткенге ой жіберіп, келешекке бағдар жасайтын ерекше кезең. Наурыздың тағы бір мәні – бұл күн адамдарды мейірімділік пен кешірімге, ізгілік пен қайырымға үндейді. Ренжіскен жандар татуласып, ағайын арасы алшақтаса, қайта жақындасатын кезең. Сондықтан бұл мереке – бір ғана табиғаттың емес, адамдардың да жүрегін жаңартатын, қоғамды жақсы істерге бастап, береке мен ырысты еселейтін мерейлі мезет.
Былтыр Мемлекет басшысының бастамасымен қабылданған «Наурызнама» тұжырымдамасы халқымыздың көне дәстүрін жаңғыртып, Наурыз мейрамын жаңа мазмұнда тойлауға жол ашты. Биылғы мереке де осы тұжырымдама негізінде ерекше форматта өтті. Әр күннің өзіндік мәні, терең ойы болды. Рухани құндылықтарды дәріптейтін, игі істерге шақыратын онкүндік іс-шаралар легі қоғам тарапынан кең қолдау тапты.
Зиялы қауым да, қарапайым тұрғындар да бұл бастаманы ықыласпен қабылдап, атсалысты. Наурыз мерекесі отбасы мен ошақ қасындағы ғана қуаныш емес, елді бірлікке, ынтымақ пен татулыққа ұйыстыратын үлкен рухани оқиғаға айналды. Бұл – халқымыздың асыл мұрасын ардақтап, оны заманауи сипатта жалғастырудың айқын көрінісі деуге толық негіз бар.
Құрметті қордайлықтар!
Ұлтымыздың мерейін өсіріп, бар болмысымызды айшықтайтын Наурыз мейрамы елімізге, әрбір отбасына ауызбіршілік пен қуаныш, құт-береке әкелсін! Әр күндеріңіз шуақты, тіршілігіңіз берекелі, ырыс-несібелеріңіз мол болсын! Ұлыстың Ұлы күні – Наурыз мерекесі құтты болсын!
Бегзат БОЛАТБЕКОВ, Қордай ауданының әкімі
