«Әкім бол, халқыңа жақын бол» деген сөз бар. Ауданымыздың ауылдық округтерінде әкімді халқына жақындастыратын науқандардың бірі – халық алдындағы есеп беру кездесулері жалғасып келеді. Бекітілген кестеге сай, дәстүрлі кездесу Сұлутөр ауылдық округінде өтті.
Сұлутөр таулы аймақта орналасқан шағын ғана округ. Құрамына Көктөбе ауылы да кіретін бұл аймақта халық саны да көп емес. Десе де соңғы жылдары осы округте ел игілігі үшін атқарылған жұмыстар аз емес. Көктөбеде жаңа мектеп салынса, Сұлутөрдегі білім ордасы күрделі жөндеуден өткен болатын. Ауылдық округке табиғи газ құбыры тартылып, тұрғындар қаладағы жайлылықты сезіну мүмкіндігіне ие болды. Ауылдық округтің әкімі Нұрлан Байсал өткен жылы осы іспеттес атқарылған жұмыстарды мектеп акт залына жиналған көпшіліктің назарына ұсынды. Оның баяндамасына сүйенсек, ауылдық округтің өткен жылғы бюджеті көше жарықтандыруға, техникалық қызмет көрсетуге, елді мекендерді абаттандыру және көгалдандыруға, стритворкаут құрылғыларын орнатуға, балалар ойын алаңшасын орнатуға, «Ауыл – Ел бесігі» бағдарламасы аясында Сұлутөр ауылындағы Пушкин көшесіне орташа жөндеу жұмыстарына жұмысалды.
Осыдан кейін сөз кезегін алған аудан әкімі Бегзат Болатбеков өткен жылы көтерілген мәселелер бойынша тоқталып, биылғы жоспарларды атап өтті. Мәселен, Сұлутөр ауылдық округінде қоқыс орындарын жоюға, Көктөбе ауылында кіші футбол алаңын орнатуға, Сұлутөр ауылындағы Жамбыл көшесіне көше жарығын орнатуға қаражат бөлінген екен. Сонымен қатар, Сұлутөр ауылындағы 4 көше, Көктөбе ауылындағы 4 көшеге орташа жөндеу жұмыстарын жүргізу бойынша бюджеттік өтінім тапсырылған. Бегзат Болатбеков округтегі көптен бері өзекті болып келген ауыз су мәселесіне тоқталды. Қазіргі таңда Сұлутөр ауылдық округінде ауыз сумен қамту жүйесі 85% тозығы жеткен. Аудан әкімдігінің тұрғын үй коммуналды шаруашылығы және автомобиль жолдары бөлімі тарапынан шамамен 1 млрд теңгеге жоба әзірленіп, сараптамадан өтуде. Алдағы уақытта тіршілік көзі судың мәселесі шешіліп қалар. Аудан әкіміне сұлутөрліктер өз сұрақтарын қойды. Мысалы, Шарбақты ауылына баратын төте жолға қиыршық тас төсеп беру, ауылдағы малға шабып жүрген жыртқыштарды жою және жер мәселесін көтерді.
Өз кезегінде Бегзат Болатбеков әр тұрғынның сұрағына жекелей жауабын беріп, әр проблемалық мәселе хаттамаға кіретінін, ол бойынша жұмыс атқарылатынын атап өтті.
