Құрметті қордайлықтар!
Сіздерді Ұлыстың Ұлы күні – Наурыз мейрамымен құттықтаймын!
Көктемнің шуақты күндерімен бірге келген Әз-Наурыз әрқайсымыздың жүрегімізге жаңару мен үміт, ізгілік пен мейірім сыйлайтын ерекше мереке. Бұл күн – сан ғасырлық тарихы бар, халқымыздың салт-дәстүрі мен тағылымға толы рухани мұрасын дәріптейтін ұлы күн.
Наурыз – табиғаттың ғана емес, адам жанын да жаңартатын мезет. Дәл осы күндері қыстың қыспағынан босап, жер бусанып, тіршілікке жан бітеді. Сол сияқты әрбір шаңыраққа шаттық орнап, татулық пен түсіністік салтанат құрады. Өткенге ой жіберіп, алдағы күнге үміт артатын, жақсы тілек пен ақ бата айтылатын Наурыз мейрамы – елдіктің, бірліктің белгісі.
Биылғы Наурыз мерекесі «Наурызнама» тұжырымдамасы негізінде жаңа мазмұнға ие болды. Әр күнінің өзіндік мәні бар бұл онкүндік ел ішінде ерекше рух пен серпін тудырды. Ағайын арасына ынтымақ ұялатқан, жақсы істерге себепкер болған бұл бастама халқымыздың дәстүрлі құндылықтарын жаңғыртып, Наурызды нағыз халықтық мерекеге айналдыра түсті.
Құрметті жерлестер!
Ұлыстың ұлы күні әр отбасына құт-береке, молшылық пен шаттық әкелсін! Егемен еліміздің ынтымағы артып, бірлігіміз бекем болсын! Жаңа күн жақсы үміттің, нұрлы болашақтың бастауы болғай!
Нұрдин САДЫҚОВ, аудандық мәслихат төрағасы
