Тарихтың тереңінен сыр тартып, Ұлы даланың сайын сахарасын жаңғыртып жеткен әз-Наурыз – тіршіліктің оянуын, табиғаттың жаңаруын, адамзаттың ізгі ниетін айшықтайтын ерекше мейрам. Самарқанның көк тасы еріп, күн мен түн теңелген бұл мереке ежелден халқымыздың қастерлі дәстүріне айналған.
Биыл да көктемнің жарқын нышаны саналатын Наурыз мерекесі Қордай жерінде ерекше сән-салтанатымен аталып өтті. Мемлекет басшысының тапсырмасына сай ел көлемінде он күнге жалғасқан Наурызнама қордайлықтар үшін де ұмытылмас думанға ұласты. Әр күннің өзіндік мазмұны айқындалып, рухани және мәдени шаралармен толықты.
Аудан жұртшылығы «Көрісу күнінен» бастау алған мерекелік шараларды «Қайырымдылық күнімен» жалғастырып, ізгіліктің үлгісін көрсетті. «Ұлттық салт-дәстүр мен мәдениет күнінде» рухани жаңғырып, «Шаңырақ күнімен» шаттанып, «Ұлттық киім күнімен» ұлттық құндылықтарымызды ұлықтады. «Жаңару күні», «Ұлттық спорт күні» сияқты мазмұнды күндер де халықтың ынтымағы мен берекесін айқындай түсті.
Наурыз думанының ең бір жарқын сәттерінің бірі – 21 наурыз «Ынтымақ күні» болды. Бұл күні Қордай ауылының орталық алаңына жиналған халық мерекенің шынайы шаттығын сезінді. Аудан әкімі Бегзат Болатбеков жұртшылықты Наурыз мерекесімен құттықтап, елге ырыс пен береке, бірлік пен татулық тіледі.
Сән-салтанаты жарасқан ақ шаңқан киіз үйлер тігіліп, жайылған мол дастархан халықтың қонақжайлығын паш етті. Бауырсағы мен қазы-қарта, наурыз көжесі мен сан түрлі ұлттық тағамдар жиналған жұртшылыққа ұсынылды. Ұлттық киім киген бойжеткендер қонақтарды ықыласпен қарсы алып, ақ дастарханнан дәм татқызды.
Алаң төрінде аудан өнерпаздарының орындауындағы «Сәлем, қазақ даласы» әні әуелеп, жүз домбырашының күмбірлеткен «Ерке сылқым» күйі ұлттық өнердің шынайы шежіресін шерткендей әсер қалдырды. Бұл көрініске сахнада өнер көрсеткен қыз-жігіттер де қосылып, думанды шараның шырайын аша түсті.
Сахна төріне көтерілген Ұмай ана мен Қыдыр ата ақ батасын беріп, елге бақ пен береке тіледі. Мереке аясында ұлттық ойындар да ұйымдастырылды. Арқан тартыс, асық ату, қазақша күрес сынды сайыстар көпшіліктің қызығушылығын тудырып, думанның көркін қыздырды. Жастар жағы белсенділік танытып, ұлттық өнер мен спортты дәріптеген сайыстар мерекенің мәнін арттыра түсті.
Әуелеген ән мен күмбірлеген күй, мың бұралған би мен жайылған мол дастархан, ағайынның арқа-жарқа қуанышы – бәрі-бәрі көктемнің бұл жарқын күнін нағыз халықтық мейрамға айналдырды.
Қордайлықтар Наурыз мерекесін биыл да жоғары деңгейде өткізіп, бірліктің бекем, татулықтың тұғырлы екенін тағы бір мәрте көрсетті.
