Соңғы жылдары Қазақстанда жас кәсіпкерлер санының айтарлықтай өскені байқалады, бұл елде инновациялық және креативті бизнестің жаңа толқыны қалыптасып келе жатқанын көрсетеді. Жастардың ынта-жігері мен тың идеялары экономиканы біртіндеп өзгертуде. Күн сайын жаңа сынақтар мен мүмкіндіктер пайда болатын әлемде жас бизнесмендер өздерінің батыл рухы мен жаңашылдыққа ұмтылуын көрсетуді жалғастыруда.
Соңғы кездері қордайлықтар арасында «shokan.mebel_korday» бренді танымал бола бастады. Бұл Қасық ауылының жас кәсіпкерлері Шоқан мен Сымбат Жапаровтардың бірлескен кәсіпорны. Бір қызығы, ерлі-зайыптылардың тапсырыс бойынша жасаған бұйымдары жарнаманы қажет етпейді. «Барыс-2» сауда кешенінің аумағында орналасқан жиһаз шеберханасы туралы тұтынушылар туыстары мен достарына айтып, бірте-бірте таныла бастаған. Осылайша, тұтынушылар саны жылдан жылға артып келеді.
Айтпақшы, ерлі-зайыптылар осыдан он бес жыл бұрын шаңырақ көтерген. Бастапқыда олар күйеуінің ата-анасымен бірге тұрып, кейін Қасық ауылынан жер телімін алып, өздеріне үй салды. Осыдан сегіз жылдай бұрын Шоқан Тараздан аралау станогын әкелген. Ең алғаш жиһазды үйдің ауласында құрастыра бастаған. Бірақ материалды кесіп, жеткізуде қиындықтар туындап, «Барыс-2» сауда кешенінен шеберхананы жалға алуды ұйғарады. Уақыт өте келе клиенттердің саны арта бастады және Жапаровтар бұрынғыдан да қуатты заманауи машиналар мен құралдарды сатып алуға шешім қабылдады. Бизнесте негізгі идеялар мен жаңа үлгілерді Сымбат тауып берсе, Шоқан сол идеяларды әдемі бұйымдарға айналдырады. Жапаровтар отбасы ең алдымен жаңа үйлерін жаңа жиһаздармен жабдықтады. Содан кейін олар өз туындыларын достарына көрсетті. Қызығушылық танытқандар жаңа жиһаздарға тапсырыс бере бастады, уақыт өте келе ірі тапсырыс берушілер пайда болды. Бір маусымда бірден үш балабақшаға жиһаз жасаған кездері де болған. Соның бірі – Сортөбе ауылындағы 150 орындық үлкен балабақша, кәсіпкерлер мектепке дейінгі мекеменің жиһаздарын толық дайындап берген. Бір қызығы, тапсырыс берушілер арасында Қырғызстан мен Алматыдан да клиенттер кездеседі.
Сымбат атап өткендей, осы уақытқа дейін наразы тұтынушылар болмаған. Өйткені олар өз жұмысын барынша беріліп, сүйіспеншілікпен орындауға тырысады. «Ең бастысы, істеп жатқан ісіңді жақсы көру керек. Табыс кілті — табандылықта», — дейді С.Жапарова.
Жапаровтардың басты ұраны – «Өзіңді жетілдір!». Жас кәсіпкерлер сонда ғана табыс көзі ашылады деп есептейді. Бүгінде отбасылық кәсіпте үлкен ұлының көмектесіп жүргені қуантады.
Қазіргі уақытта Жапаровтардың жиһаз шеберханасында кеңсеге де, үйге де жиһаз жасауға қажетті барлық жаңа әрі заманауи жабдықтар бар.
Байлық, атақ-даңқ, табыс бірден келмейтіні белгілі. Бірақ үйренуге, табандылыққа және қайта-қайта тырысуға дайын адамдар үшін нәтиже — керемет жетістік. Басында Шоқан мен Сымбаттың өз табыстарына толық сенбегенімен, жетістікке жетіп, көпшілікке үлгі бола білді. Бір қызығы, олар бәсекелестіктен қорықпайды, өйткені олар өздеріне сенімді — жиһаздың әрбір бөлігін өздері үшін жасағандай жасайды.
Анжела ИЗАЕВА
