Қордай ауданында Халықаралық жастар күні ерекше шабыттың, шығармашылық пен достықтың мерекесіне айналды. «Ұлт болашағы – жастардың қолында» деген ұранмен өткен фестивальді аудан әкімдігінің ішкі саясат бөліміне қарасты «Жастар ресурстық орталығы» ұйымдастырды. Шара ең белсенді, талантты жандарды бір алаңда тоғыстырды.
Бұл күн жай ғана мереке емес, тұтас бір ұрпақты біріктіріп, шабыттандырған ерекше сәтке айналды. Ұйымдастырушылар атап өткендей, жастар — тек елдің болашағы ғана емес, бүгінгі өзгерістердің қозғаушы күші, қазіргі күннің жаңашылдары.
Мемлекет басшысы Қасым-Жомарт Тоқаев жариялаған «Жұмысшы мамандықтар жылы» аясында өткен мерекеде аудан әкімінің орынбасары Дамира Сүгірбай сөз алып, аудан әкімі Бегзат Болатбековтің құттықтауын жеткізіп, өңірдің әлеуметтік және экономикалық дамуына еңбегімен үлес қосып жүрген жас мамандарға Алғыс хаттар табыстады.
Мерекенің музыкалық бөлімі көрермендерге ерекше тарту болды. Тараз қаласынан келген «Жалын» және «Алты Алаш» топтары сахнада өнер көрсетіп, шынайы орындау мен әсерлі әндері арқылы көрермен жүрегін жаулап алды. Қуатты энергетика, жылы атмосфера — осы кештің басты ерекшелігіне айналды.
– Шынымды айтсам, осынша ауқымды болады деп ойламадым. Бұл жай ғана концерт емес, бір отбасы секілдіміз. Осындай шаралар армандарға сенуге күш береді, – дейді 18 жастағы студент Айгерім.
– Биыл жұмысшы мамандықтарға ерекше мән беріп жатқаны қуантады. Өз мамандығымды жақсы көремін әрі мақтан тұтамын. Бүгін біздің еңбектің бағаланғанын сезіндім, – дейді 25 жастағы құрылысшы Ержан.
Отбасымен келген аудан тұрғындары мұндай фестивальдер тек көңіл көтеріп қана қоймай, жастарға үміт пен сенім сыйлайтынын атап өтті. Себебі дәл осындай алаңдарда жаңа буын өз мүмкіндігін ашуға, армандарын жүзеге асыруға алғашқы қадам жасайды.
Мереке әсерлі финалмен аяқталды — барша қатысушылар Отан туралы әнді бірге шырқады.
Шолпан САБАНОВА
