Сейсенбі күні аудан әкімінің орынбасары Дамира Сүгірбайдың жетекшілігімен Қордай ауданында қылмыстар мен құқық бұзушылықтардың алдын алу, құқықтық тәртіпті қамтамасыз ету мәселелері бойынша ведомствоаралық комиссияның отырысы өтті.
Жиынға Қордай аудандық жергілікті полиция қызметі бөлімшесінің бастығы Дармен Алимбаев және пробация қызметінің инспекторы Мырзабай Сұлтанов, ауылдық округ әкімдері, бөлім басшылары және комиссия мүшелері қатысты.
Отырыстың күн тәртібіне екі мәселе шығарылды. Алғашқы мәселе бойынша Қордай аудандық жергілікті полиция қызметі бөлімшесінің бастығы Дармен Алимбаев баяндама жасап, лудомания мен алаяқтықтың алдын алу бағытында атқарылып жатқан жұмыстар мен алдағы жоспарларды жан-жақты баяндады. Оның айтуынша, құқықбұзушылықтың бұл түрлері алаңдатарлық мәселе. Сондықтан құқық қорғау органдары халықпен тығыз жұмыс жүргізіп, түсіндіру жұмыстарын күшейту қажеттігін атап өтті.
Баяндаманы тыңдаған Дамира Сүгірбай Қордай аудандық полиция бөлімі мен облыстық департаменттің немесе басқа да құзырлы органдардың құқықбұзушылықтың алдын алу бағытында қандай келісімдер мен іс-шаралар жоспары бар екенін сұрады. Сонымен қатар, ол тұрмыстық зорлық-зомбылықтың жиі орын алуына алаңдаушылық білдіріп, бұл бағытта қандай нақты іс-шаралар қолға алынғанын анықтауға тырысты.
Осы тақырып аясында Қордай ауданы әкімдігінің ішкі саясат бөлімінің өкілі сөз алып, құқықбұзушылықтың алдын алу бойынша ақпараттық-түсіндіру жұмыстары жөнінде баяндама жасады.
Күн тәртібіндегі екінші мәселе – бұрын сотталғандардың қайта қылмыс жасауының алдын алу бағытындағы жұмыстар болды. Бұл тақырыпта Қордай аудандық пробация қызметінің инспекторы Мырзабай Сұлтанов пен Қордай ауданы әкімдігінің жұмыспен қамту және әлеуметтік бағдарламалар бөлімінің басшысы Ақсана Елеусізова баяндама жасады. Олар пробациялық бақылауда тұрған азаматтарды қоғамға бейімдеу, оларды жұмыспен қамту және әлеуметтік қолдау шаралары туралы ақпарат берді.
Комиссия отырысын қорытын-дылаған Дамира Сүгірбай жауапты тұлғаларға бірқатар нақты тапсырмалар жүктеді. Оның ішінде: Алаяқтық сипатындағы құқық бұзушылықтардың алдын алу мақсатында аудан тұрғындары арасында түсіндіру жұмыстарын күшейту; Қордай ауданы орталығы мен ауылдық округтерде осы тақырыпқа арналған арнайы билбордтар орнату; Қылмыстық-атқару жүйесінен босап шыққан азаматтардың қайта құқықбұзушылыққа жол бермеуі үшін қажетті шараларды қабылдау; Бұрын сотты болғандарды жұмысқа орналастыру мақсатында ай сайын бос жұмыс орындар жәрмеңкесін ұйымдастырып, олардың тұрақты жұмысқа орналасуына ықпал ету, т.б.
Әкімнің орынбасары тапсырмалардың орындалу мерзімі шектеулі екенін ескертіп, олардың уақтылы жүзеге асуы қатаң бақылауға алынатынын жеткізді.
Сәуле МҰХАДИН
