26 наурыз күні Қадір түні және ораза айт мерекесі құрметіне аудандық «Қордай» мешіті «Рамазан сыйы» атты қайырымдылық акциясын өткізді.
Әрқашан қайырымдылық шараларын көптеп ұйымдастырып, тұрмысы төмен отбасыларға қарайласып тұратын мешіттің бұл жолғы акциясы 100 отбасыны қамтыды. Акция барысында Рамазан айында мешітке көмек сұрап келген көп балалы отбасыларға, әлеуметтік аз қамтылған жанұяларға, мүгедек жандар мен асыраушысынан айырылғандарға әрқайсысына құны 30 мың теңгелік азық-түлік жиынтықтары таратылды. Осы күні жалпы 3 млн теңгеге қайырымдылық көмек көрсетілді. Айта кету керек, бұл қаражат мешіт келушілерінің берген пітір садақасы мен демеушілердің көмегімен жиналды.
Іс-шарада ауданның бас имамы Әлмұхаммед Егізбаев мешітке жиналған тұрғындарды Рамазан айымен құттықтып, қасиетті айдың артықшылықтары, қайырымдылық, мейірім жайлы көркем насихат, уағыз айтты. Игі іс-шара аудандық мешітте өтіп, сондай-ақ бас имамның ұйытқы болуымен «тегін такси» қызметі ұйымдастырылды. Яғни, еріктілер азық-түлікті келе алмаған жандарға үйлеріне жеткізіп берді. Қасиетті рамазан тек құлшылық айы ғана емес. Бұл айда Пайғамбарымыз (с.ғ.с.) ауыз бекітіп, ораза ұстаумен қатар, көптеп жақсылық жасауды, садақа беруді, жұртқа көмектесуді бұйырған. Осы арқылы қоғамның барлық мүшелерінің бір-бірімен бірлігі артып, қасиетті рамазан айының нығметін сезе түсуі тиіс. Осыны баса назарға алған аудандық «Қордай» мешіті ұжымы көмек алушыларды Қадір түнімен құттықтап, сәттілік тіледі.
