Қарттарым – қазынам, басымдағы бағым деген қазақ халқы ежелден-ақ үйіндегі қартын қадірлеп, оларды ерекше құрметтеген. Әдемі қарттыққа жетіп, жүздеріне сұлулықпен өрілген әжім түскен ата-әжелеріміз қашанда аман болсын!
Бүгінгі таңда мемлекетімізде қарттарға ерекше көңіл бөлініп, оларға жан-жақты қолдау көрсетілуде. Дегенмен, қарттар үйіндегі жәутеңдеген жанарлар мен есікке телмірген көздер жүректі ауыртады. Оларды мемлекет қамқорлыққа алса да, отбасының жылы құшағы мен баласының мейірімін алмастыра алмайды.
Десе де, наурыз мерекесі қарсаңында №7 Александр Пушкин атындағы орта мектебінің 7-сынып оқушылары ағылшын тілі пәнінің мұғалімдері Байсалова Дамира мен Аманбай Ғазизаның жетекшілігімен ауданымыздағы қарттар үйіне арнайы барып, олардың хал-жағдайын сұрап, амандығын тіледі. Оқушылар өз өнерлерін көрсетіп, жүзі жабырқаулы қарттардың көңілін сергітуге тырысты. Мектебіміздің кәсіподақ ұйымы тарапынан көрсетілген материалдық көмек пен оқушылардың сый-құрметі олардың жүректеріне жылу сыйлағандай болды.
Ел басына күн туған қиын-қыстау замандарда халқына тірек болып, жұртына қамқор болған қарттарымыз аман болсын! Олардың ақ батасы – біз үшін баға жетпес қазына. Қарттарым, сіздерге Алла саулық берсін, ғұмырларыңыз ұзақ болсын!
