Жұма күні Мемлекет басшысы Қасым-Жомарт Тоқаевтың қатысуымен Ұлттық құрылтайдың IV отырысы өтті. Бұл жиында қоғам үшін өзекті мәселелер талқыланды. Солардың бірі – мәдениет саласы, оның ішінде киноиндустрия жайлы болды.
Президент өз сөзінде: «Тағы бір түйткіл – қазір кинотеатрда қоғамдық сын бар. Былтыр қазақстандық мамандар түсірген 94 фильм шыққан, яғни, негізінен өзіміздің өнім шығарылып жатыр. Бұл – жақсы үрдіс. Бірақ біз ең алдымен санға емес, сапаға көңіл аударуымыз керек. Көрерменнің көңілін көтеріп, күлкі сыйлау – бір бөлек, жағымсыз әдеттерді насихаттау – бір басқа», – деп атап өтті.
Шынында да, соңғы уақытта кинотеатрларда зорлық-зомбылықты, қылмысты, қатыгездікті насихаттайтын фильмдер жиі кездесуде. Бұл – ойланатын мәселе. Себебі, кино – тек ойын-сауық құралы ғана емес, ол идеологиялық тәрбие құралы. Сондықтан Мемлекет басшысы фильмдерді, тіпті жеке қаржыға түсірілсе де, кинотеатрға шығармас бұрын алдын ала сүзгіден өткізу жолдарын қарастыру қажеттігін айтты.
Бұл – өте орынды бастама. Ұлттық құндылықтарды сақтап, көрерменге сапалы контент ұсыну – отандық киноиндустрияның басты мақсаты болуы керек.
Күміскүл СӘРСЕМБАЕВА, Қордай ауданының Құрметті азаматы
