Дана халқымыз «Отан отбасынан басталады» деп, қоғамдағы отбасының құндылығына ерекше назар аударған. Себебі, өнегелі отбасы – елдіктің тұтқасы. Ал, осы орайда сәні мен салтанаты жарасқан, берекелі шаңырақ кім-кімге болсын үлгі.
Сондай ұрпаққа берген тәлім-тәрбиесімен көпке үлгілі болған, шаттығы тасыған отбасылардың бірі – Мырзахметовтар әулеті. Қарты бардың қазынасы бар деген аталы сөз текке айтылмаса керек. Отбасының қорғаны Нәзірбай Мырзахметов 1959 жылы Көкадыр ауылында дүниеге келген. 1974 жылы Бетқайнар ауылындағы орта кәсіптік техникалық училищеде «тракторшы» мамандығын аяқтайды. Одан соң 1974-1986 жылдар аралығында «Жаңатұрмыс» совхозында жылқы бағады. Кейіннен 1986-1997 жылдар аралығында қойшы қызметін атқарады. Ал жұбайы шаңырақтың ұйытқысы болып отырған Айсалқын Қалмамбетова 1958 жылы Қырғызстан Республикасы, Сокулук ауданында дүниеге келген. Өмірлік жарымен отбасы құрғандарына 43 жыл.
«Жылқы бағу білген адамға оңай кәсіп емес. Онымен шыдамдылардың шыдамы, жан аямас еңбекқор жандар ғана айналыса алады. 1974 жылдан бастап совхозда жылқы, совхоз тарағаннан кейінгі уақытта қой бақтық. Өне бойы мал бағумен айналыстық. Қиыншылықтың барлығына төтеп бердік. Малшының күнделіктің өмірі қазақтың қай баласына да таныс жағдай. Айсалқын апаларың өмір бойы менімен бірге жүріп, кездескен қиыншылықтардың барлығын бірге еңсере білдік. Бүгінде 2 ұл 2 қыздан 10 немере сүйіп отырған жағдайымыз бар», — дейді Нәзірбай Батырбекұлы.
Еңбексүйгіштігінің арқасында ерлі-зайыптылар өнегелі ата-ана, ұлағатты ата мен әже атанды. Өмірдің сынақ сәтінен сүрінбей өтіп, ұл-қыздарының болашағы үшін қалтқысыз қызмет етті. Отбасын құрған кезден бастап мал шаруашылғымен айналыса бастады.
Нәзірбай Батырбекұлы совхоз тарағанша, қолынан қасиетті құрығын тастамай, жұбайымен бірге нағыз еңбектің майталмандары бола білді. Олай болса, рухани-адамгершілік құндылықтар тұрғысынан Мырзахметовтар отбасы келешек ұрпаққа, шаңырағын енді көтерген жас отбасыларға үлгі деуге тұрарлық дейміз. Еңбек еткен адам тек өзінің ғана емес, елдің дамуына үлес қосады. Сол себепті де халқымыз «Еңбек – ырыстың бұлағы, бақыттың шырағы» деп бекер айтпаған.
Әділет ҚҰТТЫБАЙ
