Жақында Қордай аудандық мемлекеттік архиві ғимаратында «AMANAT» партиясы аудандық филиалының «Үздік бастауыш партия ұйымы» байқауы өткізілді. Байқау бүкіл партиялық құрылымның жұмыс тиімділігін арттыру, бастауыш партия ұйымдарының рөлі мен белсенділігін күшейту, олардың ынтасын және партияның қызметіне қатысу деңгейін арттыру мақсатында ұйымдастырылған.
Жалпы біздің ауданымызда 24 бастауыш партия ұйымы бар. Негізі байқау 3 кезеңнен тұрады, аудандық байқаудың жеңімпазы Тараз қаласына барып, облыстық сынақтан өтеді. Ал одан жеңген бастауыш партия ұйымы үшінші кезеңге өтіп, Астана қаласына барып, аймақ намысын қорғайды.
Бағалау 5 өлшемшарт бойынша жүргізілді: партиялық жобаларды іске асыруға қатысу, партияішілік жұмыс, партиялық жұмыста креативті әдістерді пайдалану, БПҰ қызметін бұқаралық ақпарат құралдарында жариялау, жастармен жұмыс.
Қатысушылардың барлығы өз жұмыстарын жоғары деңгейде көрсетіп, дипломдармен марапатталды. Байқау соңында 3 жүлдеген анықталып, комиссия төрағасы Бейқұт Жамангозов оларға дипломдар мен бағалы сыйлықтарды табыстады. Осылайша, 1 орынды – «Бетқайнар» БПҰ, төрайымы Динара Орумбаева иеленсе, 2 орынға – «Ақсу» БПҰ, төрайымы Айдана Қосаумас ие болды, ал 3 орынды екі бастауыш партия ұйымы бөлісті – «Орталық» БПҰ, төрайымы Айдана Нұрқияс және «Қордай» БПҰ, төрайымы Нұргүл Мурзабаева.
Осылайша байқаудың екінші кезеңіне «Бетқайнар» БПҰ өтті. Айта кетсек, екінші кезең 20-31 қаңтар аралығында өткізілетін болады.
