Бесіктен белі шыққан баласының өзі асық атуға асығатын елдің ұлттық спортқа деген ептілігі қанына сіңген деп айтуға болады. Мемлекет басшысы Қасым-Жомарт Тоқаевтың тапсырмасына сәйкес, «Наурызнама» тұжырымдамасында 20 наурыз – Ұлттық спорт күні аталып өтіледі.
Әрбір ұлттың әдебиетімен, мәдениетімен, салт-дәстүрімен бірге жасасып келе жатқан құндылықтары болады. Сондай құндылықтардың бірі – ұлттық спорт. Ұлттық спорт түрлері – ұлтымыздың тәрбие негізіндегі алтын діңгегі. Халқымыз «Тәні саудың жаны сау» деп түсініп, қанымен, дәстүр-салтымен біте қайнасқан ұлттық спорт түрлерін бүгінгі ұрпағына мирас етті.
Ауданымызда ашылған ұлттық спорт ойындарын дәріптейтін №19 аудандық балалар мен жасөспірімдер спорт мектебі бүгінгі таңда бірқатар жұмысты еңсеруде. Қоса кететіні, ұлттық спорт түріне бағытталған жеке спорт мектеп облыс бойынша тек біздің ауданда болса, республика көлемінде саусақпен санарлық екен. Қазіргі таңда, спорт мектебінде түрлі үйірмелерде 278 спортшы шұғылданады. Оннан астам ұстаз бен жаттықтырушыдан құралған мектеп ұлттық спорттың жеті түрінен шәкірт тәрбиелеуде. Атап айтсақ, мұнда балақайлар асық ату, бәйге, көкпар, қазақ күресі, тоғызқұмалақ, аударыспақ және жамбы атудың қыр-сырын үйренуде. Тағы бір айта кететіндігі, әзірше тек Жамбыл облысында ойналатын «алаңдағы тоғызқұмалақ» ойыны бар. Бұның ерекшілігі, ұзындығы 5 метр, ені 4 метрлік алаңда 20 бала «үлкен құмалақтармен» ойнайды.
Былтырғы жылдан мәлімет бере кетсек, жалпы спорт мектебі 12 спорт шеберлігіне үміткерлерді дайындап үлгерді. Оның ішінде: тоғызқұмалақ – 9, қазақ күресі – 2, бәйге спорты –1.
Жалпы, қазақ баласының бесіктегі тербелісінен бастап, бүкіл ғұмыры ұлттық спортпен тығыз байланысты. Құрбы-құрдастарымен асық ойнауы – мергендік пен дәлдікке, ептілікке, бес жаста ат жалын тартып мінуі – батылдыққа, күресуі – әдіскерлікке, көкпар тартуы – күштілікке тәрбиелейтін құрал.
«Мектебімізде шұғылданушылар саны артып, ұлттық спортқа қызығушылық танытқандар саны күн санап көбеюде. Қазір адамдар спортпен айналысу баланың денсаулығына да, тәрбиесіне де пайдалы екенін жақсы түсінеді. Мұнда жасөспірімдер түрлі жаман әдеттерден аулақ болып, ерік-жігері мен табандылығын шыңдайды. Болашақта мұндай балалар қиындыққа төзімді, тек қана алға ұмтылатын азамат болып өседі. Сол себепті ата-аналардың да, балалардың да ықыласы күшті. Бізде олардың алаңсыз әрі қауіпсіз жаттығуына барлық жағдай жасалған», – дейді БЖСМ басшысы Шеризат Рахымжан.
Қазақтың талантты ақыны Мағжан Жұмабаев ұлттық ойындарды халық мәдениетінің бастау-бұлағы, адамның ойлау қабілетінің дамуына игі әсер ететін негізгі элементтердің бірі деп таныған. Адамға жігер беретін, санасын серпілтетін ұлттық ойындардың қай-қайсысының да руханият төрінен ойып тұрып орын алатындай қадірі мен қасиеті бар.
