Бүгінде еліміздің түкпір-түкпірінде Наурыз мерекесі тойлануда. Жақсылықтың жаршысы болған мереке аудандық білім бөліміне қарасты №1 Д.Қонаев атындағы мектеп гимназиясында кең көлемде аталып өтті.
Салтанаты жарасқан мектеп ауласында өткізілген шараға жиналған қауымның қарасы көп болды. Мерекелік шараға №1 Д.Қонаев атындағы мектеп гимназиясының директоры Назира Танабекова, директордың тәрбие жөніндегі орынбасары Айгүл Әденова және мектептің дамуына үлес қосқан білім саласының қызметкерлері мен оқушылар қатысты. Мәдени шараның шымылдығы мектеп директорының алғы сөзімен ашылды.
«Мейірім мен имандылықтың, жаңару мен жасампаздықтың бастауы, ырыс пен берекенің арқауы болған әз-Наурыз қажырлы еңбектеріңізге толағай табыстар әкелсін! Еліміз тыныш, жұртымыз аман болып, арайлап атқан әрбір таң шат көңіл, бақыт және береке сыйласын», — деп ізгі тілегін білдірді Назира Азтанқызы.
Мерекелік жиын барысында мектеп ұстаздары мен оқушылар ән мен биден шашу шашты. Сонымен қатар, мектеп ұжымының қатысуымен «Қыз ұзату», «Беташар», «Баланы қырқынан шығару», «Бесік той», «Тұсаукесер», «Тілашар» сынды қазақтың ежелден келе жатқан салт-дәстүрі мен әдет-ғұрыптарынан сахналық қойылым көрсетілді. Шара соңында келген қонақтар арнайы жайылған дастарқаннан ауыз тиіп, Наурыз көжеден дәм татты.
