Елімізде кардиологиялық көмекті өңірлерге қолжетімді ету мақсатында Ұлттық ғылыми медицина орталығының (Астана қ.) жетекші мамандары Кордай аудандық орталық ауруханасына арнайы келді. Бұл жұмыс Қазақстан Республикасы Денсаулық сақтау министрінің 2012 жылғы 30 қаңтардағы №62 бұйрығы аясында жүзеге асырылды.
Ұлттық орталықтың кардиологтары мен кардиохирургтары 2014 жылдан бері Кордай ауданының тұрғындарына тұрақты түрде консультативтік-диагностикалық көмек көрсетіп келеді. Кезекті сапар барысында мамандар туа біткен жүрек ақауы (ТБЖА) бар балаларды мұқият тексеріп, толық эхокардиографиялық (ЭхоКГ) зерттеу жүргізді. Нәтижесінде әрбір балаға жеке медициналық қорытынды жасалып, тиімді емдеу тактикасы ұсынылды. Ауыр жағдайдағы науқастарға жүрекке жасалатын операция жөнінде нұсқаулықтар берілді.
Бұл бастама жүрек патологияларын ерте кезеңде анықтауға, науқастардың жағдайын уақтылы бақылауға және қажетті ем-шараларды жедел тағайындауға мүмкіндік береді. Өңірлердегі кардиологиялық көмекті жетілдіру жұмыстары жалғасуда. Басты мақсат – балалардың денсаулығын сақтап, оларға жарқын болашақ сыйлау!
