2026 жылғы қаңтар–қыркүйек айларында Жамбыл облысында өнеркәсіп өндірісі, ауыл шаруашылығы, инвестиция, құрылыс және сауда салаларында оң динамика қалыптасты. Өңір экономикасының негізгі көрсеткіштері мен әлеуметтік-демографиялық жағдайы туралы Қазақстан Республикасы Стратегиялық жоспарлау және реформалар агенттігі Ұлттық статистика бюросының Жамбыл облысы бойынша департаменті басшысының орынбасары Гүлмира Иманбаева мәлімдеді.
Өнеркәсіп өндірісі 18,1%-ға өсті
2026 жылдың тоғыз айында облыс кәсіпорындары 1 103,6 млрд теңгенің өнеркәсіп өнімін өндірді. Өнеркәсіп өндірісінің индексі өткен жылдың сәйкес кезеңімен салыстырғанда 118,1%-ды құрады.
Өнеркәсіп құрылымында өңдеу саласы басымдыққа ие. Оның үлесі 66,1%-ды құрап, тоғыз айда 729,8 млрд теңгенің өнімі өндірілді. Саладағы өндіріс индексі 126,1%-ға жетті.
