Аудан әкімі Бегзат Болатбеков елді мекендерді аралап, тұрғындар алдында есеп беру кездесулерін жалғастыруда. Мұндай кездесулер аудан әкімінің халықпен тікелей байланыс орнатуға, олардың сұрақтары мен ұсыныстарын тыңдауға бағытталған маңызды шара болып табылады. Қазіргі уақытта елдің әлеуметтік жағдайын жақсарту үшін әкімдер мен жергілікті билік өкілдерінің халықпен тығыз жұмыс істеуі аса маңызды. Осы орайда жұма күні келелі кездесу Алға ауылында ұйымдастырылды.
Жиын регламентіне сәйкес, бірінші кезекте ауылдық округ әкімі есеп берді. Берік Әбілдаев өткен жылы атқарылған жұмыстарды баян етіп, көпшілік назарына нақты ақпарат ұсынды. Оның айтуынша округке тиесілі бюджет толығымен игерілген екен. Қаражат көшелерді жарықтандыруға, тазалық, абаттандыру мен көгалдандыруға, тротуар жолағын төсеу және де өзге жұмыстарды атқаруға жұмсалған. Осындай жұмыстарды атап өткеннен кейін сөз кезегін алған аудан әкімі алғалықтардың өткен жылы көтерген мәселелері бойынша есеп беріп, биылғы жылғы жоспарларды тізіп өтті. Мысалы, биыл Көгадыр ауылында «стрит-воркаут» алаңы салынады, Алға ауылында жануарларды жоюға арналған биотермиялық шұңқыр жасалады, сонымен қатар Алға ауылында спорт залдың құрылысы да жоспарда бар екен. Ал, биыл басталатын ең ауқымды жоба ол – Алға ауылында ауыз су жүйесі толығымен жаңартылады. Осы жоба іске асырылғанда ауылдағы тағы бір өзекті мәселе – электр қуатымен қамту жүйесі де жаңартылмақ. Осы мәселені атап өткен Бегзат Болатбеков тұрғындардың өзге де сұрақтарына жауабын берді. Мектеп акт залына жиналған тұрғындар Мұзбел ауылындағы газ мәселесі, ауыл шаруашылық жерлер, асфальт зауытының төңіректі ластауы сынды мәселелерді көтерді. Әр азаматтың сауалы жауапсыз қалмады.
Аудан әкімі тұрғындармен кездесу кезінде басты назарды олардың күнделікті өміріндегі мәселелерге аударды. Әкімнің айтуынша, халықтың сұрақтарына ашық жауап беру, олардың проблемаларын шешуге қатысты нақты шаралар қабылдау – тиімді басқарудың негізі. Әкім тұрғындарға ауданның әлеуметтік-экономикалық жағдайын жақсарту үшін атқарылып жатқан жұмыстарды түсіндіріп, маңызды жобалар туралы ақпарат берді.
