19 наурызда Қордай ауданында аудандық ардагерлер кеңесі мен мәдениет және тілдерді дамыту бөлімінің ұйымдастыруымен батагөй қариялардың «Аталар сөзі – ақылдың көзі» атты дәстүрлі байқау өткізілді. Бұл шараның негізгі мақсаты – қазақ халқының маңызды рухани құндылықтарының бірі болып табылатын бата беру дәстүрін дәріптеу, оны келер ұрпаққа үлгі ету және халық шығармашылығын дамыту.
Байқауға ауылдық округтерден жасы 64 пен 82 жас аралығындағы 15 қария қатысты. Іс-шараға сондай-ақ ардагерлер, кимешек киген апалар, колледж студенттері мен мектеп оқушылары қатысты. Байқау төрт кезеңнен тұрды: ұлттық салт-дәстүр бойынша бата беру, белгілі тұлғалардың батасын айту, қатысушылардың өз батасы және сұрақ-жауап кезеңі.
Байқаудың ашылуында аудан әкімінің орынбасары Д. Сүгірбай құттықтау сөз сөйлеп, қатысушыларға сәттілік тіледі. Сонымен қатар, құттықтау сөздер «AMANAT» партиясының Қордай аудандық филиалының төрағасы Б. Жамангозовқа және аудандық ардагерлер кеңесінің төрағасы Б. Әлімбетке берілді.
Қазылар алқасының шешімі бойынша Бас жүлде: Құттықов Еркінбек (Қордай), I орын: Орынтай Бауыржан (Қаракемер), II орын: Абдиматов Жайсанбек (Әлжан ана), II орын: Бозжаев Ерғазы (Қордай), III орын: Құрманбаев Дүйсәлі (Қызылсай), III орын: Рахымбаев Серікбай (Ноғайбай) берілді.
Қалған қатысушылар ынталандыру сыйлықтарымен марапатталды. Қордай аудандық ардагерлер кеңесі барлық қатысушыларға алғысын білдіріп, бата беру дәстүрін жандандыру бағытында олардың еңбегін жоғары бағалады.
Сонымен қатар, аталмыш шараның ұйымдастырылуына қолдау көрсеткен «Жастар ресурстық орталығы» КММ мен аудандық Мәдениет үйіне ерекше алғыс айтылды.
