Ауызбіршілік – кез келген қоғамның, әсіресе ауылдың дамуы мен тұрақтылығының басты тірегі. Қазақ халқы қашанда бірлік пен ынтымақты ең басты құндылықтардың бірі деп білген. «Бірлік бар жерде – тірлік бар» деген нақыл сөз осының айқын дәлелі. Ынтымақ – елдің тұтастығы мен қоғамның тұрақтылығын қамтамасыз ететін басты күш саналады. Соның бір дәлелі жақында Кенен ауылында орын алды.
Кенен ауылының жастары игі бастама көтеріп, ауыл мешітінің имамына автокөлік сыйлады. Бұл – тұрғындардың имандылыққа, бірлік пен қайырымдылыққа деген ерекше құрметінің көрінісі.
Ауыл мешітінің имамы Саят Рахимов 20 жылдан бері халыққа рухани қызмет етіп, елдің бірлігі мен татулығына үлес қосып келеді. Ол жұртшылыққа дұрыс бағыт-бағдар беріп, жастарды тәрбиелеу жолында аянбай еңбек етіп жүр. Осыны бағалаған ауыл жастары өзара қаражат жинап, имамға көлік алып беруді жөн санапты.
Ораза айттан кейін белсенді жастар имамға көлік кілтін салтанатты түрде табыс етіп, ауыл жамағаты атынан алғыстарын айтты. Шара барысында ақсақалдар мен ауыл тұрғындары жастардың бұл ісіне ризашылықтарын білдіріп, имамға сәттілік тіледі. Жастардың айтуынша, бұл сыйлық – тек алғыс белгісі ғана емес, сонымен қатар игі істердің жалғасуына жасалған қадам.
– Имамымыз әрдайым ауылымыздың тыныштығы мен ынтымағы үшін еңбек етіп келеді. Біз оның қызметін бағалап, алғысты іспен білдіруді жөн көрдік. Бұл – жастардың бірлігінің, ауылдастардың ауызбіршілігінің белгісі, – дейді белсенді жастардың бірі.
Өз кезегінде имам бұл күтпеген сыйлыққа алғысын айтып, ауыл жұртшылығына ризашылығын білдірді.
Айта кетер болсақ, ауыл имамы Саят Құрманғалиұлы 2005 жылдан бері Кенен ауылдық мешітінде қызмет етіп келеді. Оған дейін Қордай мен Отар ауылдарында имам болған. Діни білімді Қырғызстандағы Азирети Умар атындағы Ислам университетінде алған, кейін Алматыдағы имамдарды даярлау институтында білімін толықтырған.
Кенен ауылының бұл бастамасы өзгелерге үлгі боларлық іс. Олай дейтініміз мешіт жанындағы асхананың толық құрылысын да ауыл азаматтары атқарып шығыпты, қазір ол орын халықа лайықты қызмет етіп келеді.
Қайырымдылық пен сыйластық бар жерде береке мен бірлік болатыны сөзсіз. Мұндай игі істер ауылдың рухани дамуына және тұрғындар арасындағы ауызбіршілікті нығайтуға зор үлесін қосады деп білеміз.
Жандос ОМАРОВ
