Қазақстан – көпұлтты мемлекет. Бұл жерде түрлі ұлт өкілдері бір шаңырақ астында тату-тәтті өмір сүріп келеді. Осы үйлесімділік пен бейбітшіліктің шағын көрінісі – Қордай ауылында тұратын Гайнутдиновтер отбасы. Олар түрлі мәдениеттер мен дәстүрлерді үйлестіре отырып, сүйіспеншілік пен сыйластықтың үлгісін көрсетіп отыр.
Вячеслав пен Дидардың махаббат хикаясы Алматы қаласында басталған. Қарағанды қаласының аруы Дидар Қазақ ұлттық университетінде кондитер болып жұмыс істеген кезде, Қордайлық жігіт Вячеслав сол жерде жүргізуші болып еңбек етті. Бір жерде жұмыс істей жүріп, таныстықтары махаббатқа ұласып, 2008 жылы қос ғашық шаңырақ көтерді. Екі жақтың ата-аналары да бұл некеге қуана қолдау білдіріп, бақытқа бастар жолда балаларына ақ баталарын берді.
Дидардың айтуынша, Вячеслав көпұлтты отбасында тәрбиеленген. Анасы – орыс, әкесі – татар. Сондықтан ол бала кезінен-ақ әртүрлі мәдениеттердің дәстүрлерін бойына сіңіріп өскен. Өз кезегінде, Вячеслав бұл құндылықтарды өз отбасында да сақтап келеді.
«Тойымыз қазақтың салт-дәстүрлеріне сай өтті. Құдалық, ұзату, беташар – барлығы да жасалды. Үйленгеннен кейін ата-енемізден бөлек шықсақ та, байланысымыз өте тығыз болды. Екі ұлттың мерекелерін бірге тойлаймыз. Айт күндері бауырсақ пісірсек, Пасха мен Масленницада құймақ дайындаймыз. Біз бәрін бөліп-жармай, біртұтас отбасы болып өмір сүріп келеміз», – дейді Дидар.
Бүгінде Вячеслав пен Дидар екі баланың ата-анасы. Қызының есімін – Аружан деп нағашылары қойса, ал ұлының есімін – Асхат деп әкесі өзі таңдаған.
«Үйде екі тілде сөйлейміз. Балаларымыз орыс тілінде білім алса да, қазақша еркін сөйлейді», – дейді Дидар ханым.
Гайнутдиновтер отбасы ұлттық дәстүрлерді құрметтей отырып, заманауи өмірге де бейімделген. Вячеслав қазақ халқының мәдениетін ерекше бағалап, ұлттық тағамдарын сүйсініп жейді. Оның сүйікті асы – ет, ал Наурыз көжені ерекше ықыласпен қабылдайды.
Дидар ханым Қордай ауданындағы наубайханалардың бірінде кондитер болып жұмыс істейді, ал Вячеслав – механик. Ол өзінің жеке техникалық жөндеу орталығын ашып, кәсібін дамытып отыр. Ерлі-зайыптылардың айтуынша, адал еңбек пен өзара сыйластық – олардың отбасының мызғымас негізі.
«Жаман ұлт жоқ, әр адамның жақсы немесе жаман қасиеті оның ұлтына емес, тәрбиесіне байланысты. Бақытты отбасының кілті – сыйластық пен жүректің үндестігі», – дейді ерлі-зайыптылар.
Гайнутдиновтер отбасының жарасымды өмірі – еліміздегі этносаралық татулықтың шағын үлгісі. Осындай отбасылар қоғамның мызғымас іргетасын құрайды.
«Біздің басты тілегіміз – еліміз аман, жұртымыз тыныш болсын! Отбасымыздағы татулық әр шаңыраққа жұғысты болып, әрбір жанұя махаббат пен бірлікке негізделсе екен. Біз сияқты аралас отбасылар тату-тәтті өмір сүріп, Қазақстандағы бейбітшілік мәңгі жалғасса дейміз», – деп түйіндейді олар.
Сәуле МҰХАДИНҚЫЗЫ
