15 мамыр күні Ноғайбай ауылшаруашылық колледжінде 1974 жылғы түлектердің басын қосқан айтулы жиын өтті. Осыдан елу жыл бұрын техникумның табалдырығын имене аттаған жастар бүгінде самайын қырау шалған абзал ағалар мен аяулы аналар. Жарты ғасырдан кейін қауышқан түлектер сол бір мөлдір шақты еске алып, сағыныштарын білдіріп жатты.
Ерекше тебіреніске толы кездесу жайында жазбас бұрын білім ордасының тарихына тоқталып өтуді жөн көрдік. Білім мекемесі 1957 жылы Қазақ КСР Министрлігі Кеңесінің қаулысымен ашылған. Бұл оқу орны алғаш рет «Орман шаруашылығы және ауыл шаруашылығын механикаландыру техникумы» деп аталды. Кейін Қазақ КСР Министрлігі Кеңесінің 1964 жылғы қаулысымен техникум Красногор кеңшар техникумы болып аталды. 1968 жылы 440 орындық №1 жатақхана салынып, қалған қордайлық (Мұзбел) студенттер үшін екі қабатты студенттік корпус пен совхоз шеберханасы казармалық кабинет ретінде пайдалануға берілді. 1970-71 оқу жылының басында Спорт және балет сарайы үшін 440 орындық №2 жатақхана және оқу корпусының үштен бір бөлігі пайдалануға берілді. 1994 жылы ақын, сазгер К.Әзірбаевтың 100 жылдығына байланысты Красногор мемлекеттік техникалық училищесі К.Әзірбаев атындағы Красногор мемлекеттік техникалық училищесі болып аталды. 1995 жылы қайта құру кезінде ауыл шаруашылығы техникумы кеңшар құрамынан бөлініп, Қордай ауыл шаруашылығы техникумы болып өзгерді.
Салтанатты шараға 1974 жылғы техникумның түлегі, әр жылдары Алматы және Жамбыл облыстарының әкімі болған мемлекет қайраткері, Қазақстан Республикасының Ауыл шаруашылығы министрі болған Серік Әбікенұлы Үмбетов Алматы қаласынан арнайы келді.
Сонымен қатар, жиынға колледждің бұрынғы басшылары Әбдіболат Иманқұлұлы Иманқұлов пен Барлыбай Рысбекұлы Рысбеков қатысты. Шараның тағы бір маңызды қонағы Серік Үмбетовтің ұстазы Есболат Нүсіпбаев болды. Айтпақшы, жас студент Үмбетовті ауыл шаруашылығын механикаландыру негіздерімен таныстырған да осы азамат болатын.
Б.Рысбеков өз ісіне берілгендігі, мықты ұжымның жасақталғаны туралы айтып берді. Өйткені, ол басшылық еткен жылдары кәсіби кадрлардың мықты діңгегі қалыптасты.
«Ауылшаруашылық техникумындағы еңбек жолым сонау 1973 жылдан басталды. Мен қарапайым мұғалім болып бастадым. 1994 жылы директор болып тағайындалдым, айтпақшы, дәл осы кезеңде техникум мәртебесін алдық. Зейнеткерлікке шыққанша осында жұмыс істедім, сондықтан да бұл оқу орны мен ұжымы мен үшін өте қымбат. Түлек ретінде, директор ретінде Серік Әбікенұлынан көмек сұраған сәт есімде қалды. Сол жылдар қиын болды. Кейін оның қолдауының арқасында күрделі жөндеу жұмыстарын жүргізуге мүмкіндік туды. Бұл білім ордасы дәл Серік Үмбетовтің қажыр-қайратының нәтижесінде шалқып қалғанын айта кеткен жөн. Осы колледж қабырғасында өткен тамаша жылдарды бірге еске алдық», — деп бөлісті естелігімен Барлыбай Рысбекұлы.
Кездесу барысында түлектер табыстарымен бөлісіп, оқыған жылдары мен оларға тәлімгер, шабыт көзі болған ұстаздары туралы әңгімеледі. Серік Әбікенұлы құрбыларымен, ұстаздарымен, колледж директорымен және іс-шара қонақтарымен бірге бүкіл колледжді аралап, өзі оқыған кабинеттерді аралап, тіпті оқыған жылдары өзі отырған партаға да отырды. Спортзалға барып, сурет көрмесін және болашақ мал дәрігерлерінің аудиториясын тамашалады. Түлектер оқу кабинеттерін, зертханаларды және колледж музейін аралап, оқу орнының тарихы мен дамуына арналған альбомды, коллажды және стендтерді зор ықыласпен көріп шықты. Қонақтар қазіргі студенттердің дайындығы мен шеберлігінің жоғары деңгейін атап өтіп, Ноғайбай ауыл шаруашылығы колледжінің ауыл шаруашылығы саласына білікті мамандар дайындайтын ұстахана болып қала беретініне сенім білдірді.
Содан соң барлық түлектер мен қонақтар концертті тамашалау үшін колледждің акт залына шақырылды. Салтанатты бағдарламада колледж директоры Дәурен Уәлиұлы Кенжебеков сөз алып, бұрынғы студенттерге жылы лебізін білдірді. Сондай-ақ бүгінгі кездесудің қаншалықты әсерлі және маңызды болғанын атап өтіп, Серік Әбікенұлына уақыт тауып келгені үшін алғысын білдірді. Шара барысында Әбдіболат Иманқұлұлы, Барлыбай Рысбекұлы, Серік Әбікенұлы және оның курстасы Уәлихан Манабаевтар да сөз алып, жарты ғасырдан кейінгі жүздесуді ұйымдастырып отырған замандастарына ризашылықтарын білдіріп, жастық дәуренді бірге өткізген жолдастарға деген сезім ешқашан ұмыт болмайтынын жеткізді. Серік Үмбетов колледжге естелік сыйлықтарын тарту етсе, ұстаз Нұрғали ата ақ батасын беріп, жиналғандарға амандық, жақсылық тіледі.
Осыдан кейін жиналған қауым концерттік бағдарламаны тамашалы. «Томирис» би ансамблі жалынды биін орындады. Ауыл шаруашылығы колледжінің оқытушылары арасынан құрылған вокалды-аспаптық ансамбльдің өнері нағыз тосын сый болды. Ансамбль «Беу айдай» әнін орындаса, Жанар Құрманқұл «Қазақстаным» патриоттық композициясын ұсынды, сонымен қатар қонақтар Дамир Әнуарбектің орындауындағы «Замандас» әнін тыңдады. Тағы бір сыйлық С.Үмбетовтің сөзіне жазылған әндер болды. Айтпақшы, осы кеште Саят Медеуов пен Мәди Дәуренұлының туған жері туралы шығармалары орындалды.
Концерттен кейін колледж басшылығы мен ұжымы мерекелік дастарханға шақырылды.
50 жыл бұрынғы түлектердің басқосуы олардың қайтадан жас студент ретінде сезінуіне мүмкіндік берген ұмытылмас оқиға болды. Олар бір-бірімен тығыз байланыста болып, кездесулерге жиі келіп, өскелең ұрпаққа өмірлік тәжірибелерімен, ақыл-кеңестерімен бөлісуге уәде берді.
Мадина УЗБЕКОВА
