Жамбыл облысы әкімінің тапсырмасына сәйкес Қордай ауданындағы барлық мектептерде «Taza like» бағдарламасы аясында «Болашақты бірге отырғызамыз» акциясы өтті. Ауқымды экологиялық іс-шараға он мыңға жуық адам қатысып, мектеп аумақтарын көгалдандыруға өз үлестерін қосты.
№1 Қонав атындағы мектеп-гимназияда бастау алған шараға аудан әкімінің орынбасары Бақыт Сахатов қатысып, барлығына сәттілік тіледі. Акция барысында аудан көлемінде 68 туя, 49 смарагд, 78 жеміс ағашы, 19 сирень, 25 қарағаш, 29 терек және 15 қайың ағашы отырғызылды. Сонымен қатар, 2500 текше метр аумақ қоқыстан тазартылып, абаттандыру жұмыстары жүргізілді.
Бұл шара оқушылардың табиғатқа деген сүйіспеншілігін арттырып, экологиялық мәдениетін қалыптастыруға бағытталған. Акция барысында қатысушылар қоршаған ортаны қорғаудың маңыздылығын түсініп, табиғатты аялаудың ортақ міндет екенін тағы бір мәрте сезінді.
Табиғатты қорғау, аялау әрбір азаматтың міндеті екені рас. Осы ретте, Ахмет Байтұрсынұлы атындағы орта мектебінде де «Таза Like» акциясы өткізілді.
Тазалық шарасы жастарды еңбекке баулу, олардың табиғатқа деген жанашырлығын арттыру, туған өлкеге патриоттық сезімін қалыптастыру, ауданымыздың көркеюіне, тазалануына жұмыла үлес қосу мақсатында ұйымдастырылды. Экологиялық акцияға аудандық білім бөлімінің қызметкерлері және білім бөліміне қарасты мектеп ұстаздары мен оқушылары, ардагерлер кеңесінің мүшелері қатысты. Әуелі ауыл ақсақалынан бата алып, қолдарына күрек, суқұйғыш ұстаған қатысушылар шаруаға білек сыбана кірісіп кетті. Акция аясында отызға жуық шырша көшеттері отырғызылды. Дәстүрге айналған шара алдағы уақытта да жалғасын таппақ.
