Жамбыл облысының прокуроры «KORCEM» жауапкершілігі шектеулі серіктестігіне жұмыс сапарымен барып, жұмыс жағдайларымен танысып, еңбек ұжымдарымен кездесті.
Іс-сапар барысында облыс прокуроры Нұрғалым Әбдіров, аудан прокуроры Бірлік Ізбасаров, аудан әкімінің орынбасары Бақыт Сахатов «KORCEM» цемент зауытының басшылығымен бірлесіп кәсіпорын жұмысшыларының қазіргі тұрмыстық жағдайларымен танысты.
«Президент Қасым-Жомарт Тоқаев 2025 жылды «Жұмысшы мамандықтары жылы» деп жариялаған болатын. Бұл тұста жұмыс беруші тарапынан еңбек заңнамасын сақтау, еңбек қауіпсіздігін қамтамасыз ету мен қызметкерлерді әлеуметтік қолдау айрықша маңызға ие. Азаматтардың еңбек құқықтары сақталуын қамтамасыз ету прокурорлық қадағалаудың басым бағыттарының бірі болып табылады», — деді Нұрғалым Мәжитұлы.
Қадағалаушы орган өкілдерінің қатысуымен кезекті жиын аудан әкімдігінің ғимаратында жалғасты. Аталмыш жиында аудан әкімінің орынбасарлары, бөлім және мекеме басшылары, жергілікті кәсіпкерлер бас қосты.
Шара барысында сөз кезегін алған облыс прокуроры бас қосудың мән-жайын түсіндірді.
«Өздеріңіз білетіндей, Президентіміз Қасым-Жомарт Тоқаев биылғы жылды жұмысшы мамандықтары жылы деп жариялады. Біздің мақсат – еңбек ұжымындағы қызметкерлер тарапынан қойылған еңбек даулары, өзге де өзекті мәселелер бойынша туындап жатқан мәселелердің бар-жоғын анықтау және оларды заң шеңберінде шешуге ықпал ету. Сондықтан бүгін сіздерге арнайы келіп, Заңды қадағалайтын орган ретінде осы мәселені қозғап отырмыз», — деді Нұрғалым Мәжитұлы.
Сонымен қатар, кәсіпкерлердің құқықтарын қорғау бойынша атқарылып жатқан жұмыстарға тоқталып, проблемалық мәселелер туындаған жағдайда заң шеберінде сүйемелдеу жұмыстарын жүргізетінін жеткізді.
Әрмен қарай, облыстық Мемлекеттік кірістер департаменті басшысының орынбасары Ерлан Керимов, аудан әкімінің орынбасары Жұлдызбек Бақаев аталмыш шараның тақырыбына сай баяндамаларымен таныстырды.
