Құрметті қордайлықтар!
Сіздерді жаңа 2025 жылменен шын жүректен құттықтаймын!
Өткен жыл ауданымыз үшін шын мәнінде бірлік пен берекенің, жаңа жетістіктер мен толайым табыстың кезеңі болды деп айтуға болады. Экономикада еңселі биіктерді еңсердік. Нақтырақ айтсақ, өнеркәсіп өнімдерінің көлемі артты. Мемлекеттік қолдаулардың нәтижесінде ауыл шаруашылығында жемісті жұмыс жүрді.
Ауданымызда тұрғын үйлер пайдалануға беріліп, жаңа мекептер ашылып, мәдениет ошақтары, спорт кешендері мен денсаулық сақтау нысандары бой көтеріп, ел игілігі үшін жаңа құрылыстар мен жобалар бастау алды. Көгілдір отын ауданымыздың шалғай ауылдарына дейін жетті.
Жол жөндеу, инженерлік-инфрақұрылым бағытында атқарылған жұмыстар да нәтижелі болды.
Қордайда орын алған әр игілікті іске әрқайсыңыздың жеке үлестеріңіз бар деп санаймын. Сондықтан баршаңызға жасампаз еңбектеріңіз бен елге деген жанашыр ниеттеріңіз үшін ризашылығымды білдіремін.
Ардақты жерлестер!
«Өткен күнге өкпе жоқ, келер күннен үміт көп» демекші, келе жатқан жаңа жылдан да күтеріміз көп. Басты мақсат – ауданның әлеуметтік-экономикалық жағдайын үздіксіз алға дамыта отырып, аудан тұрғындарының тұрмыстық жағдайын жақсарту, нәтижелі жұмыспен қамту, бизнесті дамыту.
Жаңа жылды қашанда алдағы уақыт көшінен қуаныш, жақсылық, жағымды жаңалық күтетін, өткен өмір жолымызға есеп беретін, келешек бағыт-бағдарымыз бен мақсат-міндеттерімізді белгілейтін мереке ретінде асыға күтеміз. Келер жылдан күтер үмiтiмiз де, тiлер тiлегiмiз де жетерлiк.
Жаңа жылда Сіздерге игілік пен ізгілік, дендеріңізге саулық, шаңырақтарыңызға бақ-береке тілеймін.
Жаңа жыл құтты болсын, қымбатты жерлестер!
Бегзат БОЛАТБЕКОВ, Қордай ауданының әкімі
