E-Өтініш – Қазақстанда мемлекеттік органдарға жүгіну рәсімін жеңілдету мақсатында енгізілген бірыңғай цифрлық платформа. Бұл жүйе азаматтардың өтініштерін, шағымдарын, ұсыныстарын және сұрақтарын онлайн түрде тіркеп, олардың орындалу барысын қадағалауға мүмкіндік береді. E-Өтініш мемлекеттік қызмет көрсету сапасын арттырып, ашықтық пен есептілікті қамтамасыз етуге бағытталған.
Жүйенің негізгі мақсаты
E-Өтініштің басты мақсаты – азамат пен мемлекеттік орган арасындағы коммуникацияны жеңілдету. Бұрын әр орган өзіне жеке келіп түскен өтініштерді бөлек жүргізсе, жаңа жүйе барлық өтініштерді ортақ ақпараттық кеңістікке жинақтады. Бұл қайталанған хаттарды азайтып, азаматтық өтініштерді өңдеуді тиімді етеді.
E-Өтініштің артықшылықтары
— Онлайн қолжетімділік. Азаматтар өтінішті үйден шықпай-ақ электронды түрде жібере алады.
— Бақылау мүмкіндігі. Пайдаланушы жеке кабинет арқылы өтініштің қай кезеңде тұрғанын көре алады.
— Ашықтық пен айқындық. Жүйе әр қадам бойынша ақпараттандырып, мемлекеттік органдардың жұмысын бақылауға мүмкіндік береді.
— Уақыт үнемдеу. Қағазбастылық азайып, өтініш беру жылдамырақ болады.
— Бір терезе қағидаты. Барлық өтініштер бір платформада қаралады, қай органға жіберу керектігін жүйе өзі анықтайды.
E-Өтінішке жүгіну үшін азаматқа:
-электрондық үкімет порталына немесе «E-Өтініш» мобильді қосымшасына кіру;
-ЭЦҚ (Электрондық цифрлық қолтаңба) немесе бір реттік SMS-қолтаңба арқылы авторизациядан өту;
-өтініштің түрін таңдап, мәтінді толтыру;
-қажет құжаттарды тіркеу жеткілікті.
Өтініш тіркелгеннен кейін оған автоматты түрде нөмір беріледі, ал азамат жеке кабинеті арқылы өңдеу барысын бақылай алады.
Жүйенің мемлекеттік басқарудағы рөлі
E-Өтініш мемлекеттік органдардың азаматтармен кері байланысын жақсартып, қоғамдағы мәселелерді шынайы уақыт режимінде анықтауға көмектеседі. Статистикалық деректер арқылы мемлекеттік саясатты жетілдіруге, проблемалық аймақтарды табуға және шешім қабылдау сапасын арттыруға мүмкіндік береді.
E-Өтініш – цифрлық трансформация дәуірінде Қазақстан қоғамының қажеттіліктеріне сай келетін заманауи құрал. Ол азаматтардың құқықтарын қорғау, мемлекеттік қызметтердің қолжетімділігін арттыру және ашық әрі тиімді мемлекеттік басқаруды қалыптастыруда зор рөл атқарады.
А.Альханова, Қордай сот әкімшісі басшысының м.а.
