Көктем келіп, жердің тоңы жібіген кезде бастау алатын жыл сайынғы көктемгі егіс дала жұмыстары Қордайда биыл да қарқын алды.
Ауыл шаруашылығы бөлімінің мәліметін-ше, ауыл шаруашылығы дақылдарының егіс алқаптарының құрылымын әртараптандыруға сәйкес, биыл егістік көлемін 137787 мың гектарға орналастыру жоспарланып отыр екен.
Оның ішінде тиісті гектарларға дәнді және дәнді бұршақты дақылдар, майлы дақылдар, қант қызылшасы, картоп, көкөніс-бақша дақылдары және мал азығы дақылдары егілетін болады. Қордай аграрлы аудан болғандықтан, мемлекет қолдауының нәтижесінде өңірде жыл сайын егістік көлемін арттыруға мүмкіндік туып отыр. Мәселен, өткен жылы егістік көлемі 137401 гектарды құраған. Биыл бұл көрсеткіш 386 гектарға артады деп жоспарлануда. Сонымен қатар, өңірде өсімдік шаруашылығын әртараптандыру мақсатында дәнді дақылдар, майлы дақылдар, қант қызылшасын, көкөніс-бақша, картоп және мал азықтық дақылдардың да көлемін арттыру көзделуде.
Жекелей тоқталып өтер болсақ, 2025 жылдың өнімі үшін ауыл шаруашылығы дақылдарын 103780 гектарға орналастыру жоспарлануда екен. Дақылдар бойынша: күздік бидай -17000 га, жаздық арпа — 39000 га, дәндік жүгері – 8000 га, мақсары – 200 га, қант қызылшасы – 560 га, картоп – 3100 га, көкөністер– 4170 га, бақша дақылдары – 350 га және мал азығы дақылдары – 31400 га алқапты құрайды.
Ауыл шаруашылығындағы маңызды шара — тұқым дайындығы бойынша да мамандардан сұрастырған едік.
«2025 жылдың есебіне себілген – 20 900 га күздік бидайға – 3 762 тонна тұқым жұмсалды. Оның ішінде: I класс – 2 445 тонна, II класс -1 317 тонна және репродукция бойынша: І репродукция – 108 тонна, ІІ репродукция – 2 198 тонна; ІІІ репродукция – 1456 тонна болды. Көктемгі дала жұмыстарына 18102 тонна тұқым қажет десек, оның 15424 тонна тұқым көлемі қолда бар, немесе 85,2 %-ды құрайды. Қалған жетіспейтін 2678 тоннасын дәндік және сүрлемдік жүгері, қант қызылшасы тұқымдарын облысымыз бен көрші өңірлердегі тұқым өндіруге және сатуға аттестаттаған шаруашылықтар тарапынан толықтырылатын болады», — дейді аудан әкімдігінің ауыл шаруашылығы бөлімі басшысы Ғалымжан Оспанов.
Бөлім басшысы сонадай-ақ, қазігі таңда аудан бойынша 2025 жылы жер жырту жоспары 62280 гектар екенін жеткізіп, бүгінгі күнге 35065 га жыртылып, өңделіп 56% орындалғанын айтты. Ауа-райының қолайсыздығына байланысты көктемгі дала жұмыстары былтырғы жылмен салыстырғанда кеш басталған.
Биылығы жылы жанар–жағар май бойынша оператор болып «Wedo Energy» ЖШС-ы айқындалған. Орналасқан жері Тұрар Рысқұлов ауданы. Көктемгі дала жұмыстарына 72 шаруа қожалықтары «ГосАгро» ақпараттық жүйесі арқылы арзандатылған 2185 тонна дизель отынына өтінім берген. Бекітілген 1 литрдің бағасы 260 теңгеден шаруашылықтар өздері тасымалдаса, 255 теңге оператор тиісті жеріне жеткізіп береді.
Жандос ОМАРОВ
