КӨПТЕН КҮТКЕН ЖАҢАЛЫҚ: ҚОРДАЙ АУЫЛЫНДА ЗАМАНАУИ КИНОТЕАТР АШЫЛДЫ
Қордайда көптен күткен оқиға – тұңғыш заманауи «Qorday Cinema» кинотеатрының ашылуы өтті. Осы қуанышты күнге орай қазақстандық шоу-бизнес жұлдыздары, шараның құрметті қонақтары Олжас Абай мен Дариға Бадықова жаңа ғимараттың қызыл лентасын қиды.
Кинотеатрдың іске қосылуы кәсіпкерлер отбасы Мадияр Жусамбаев, Салима Бекмурзаева және олардың серіктесі Жанар Жұмағұлованың бірлескен еңбегінің арқасында мүмкін болды. Салтанатты ашылуы барысында Қордай ауылдық округінің әкімі Әділет Қаспақбаев ауыл тұрғындары мен қонақтарды осындай маңызды оқиғамен құттықтап, жаңа мәдени ошақ жұмысына сәттілік тіледі.
«Заманауи мәдениет ошағына ие болған Қордай ауылы бүгінде бұрынғыдан да көркейе түсті. Мұнда әркім салт-дәстүріміз бен мәдени құндылықтарымызды насихаттайтын отандық фильмдерді тамашалай алады. Ауылымыздың көркеюіне, жаңа жұмыс орындарының ашылуына, халықтың тұрмыс-тіршілігінің жақсаруына өз үлесін қосып жатқан жергілікті кәсіпкерлердің қатары артып келе жатқаны қуантады. Осыған жағдай жасаған жандарға барша тұрғындар атынан шын жүректен алғыс айтамын», — деді Әділет Меделбекұлы.
БҮКІЛ ОТБАСЫ ҮШІН ЖАЙЛЫ ДЕМАЛЫС ОРНЫ
«Qorday Cinema» кинотеатрында келушілердің жайлылығы үшін барлық жағдай жасалған. 96 орынға арналған көрермен залы кең форматты экранмен және заманауи дыбыстық аппаратурамен жабдықталған, бұл көрсетілімнің тамаша сапасын қамтамасыз етеді. Қойылымның басталуын күтіп, демалыс аймағында попкорн, түрлі сусындар мен жеңіл тағамдар сатып алуға болады. Кинотеатрға бару бүкіл отбасына шағын мерекеге айналуы үшін мұнда барлық жағдай жасалған.
АЛҒАШҚЫ ПРЕМЬЕРА ЖӘНЕ ЖАРҚЫН ЭМОЦИЯЛАР
Салтанатты шара режиссер Әнуар Мәтжановтың «Таптым-ау сені-2» жаңа комедиясының трейлерін көрсетумен аяқталды. Көрермендер 28 қарашадан бас-тап еліміздің түкпір-түкпіріндегі кинотеатр экрандары арқылы көрсетіле бастайтын фильмнің үзінділерін бірінші болып көру мүмкіндігіне ие болды. Бұл нысан жас көрермендер үшін ерекше қуаныш: енді олар өздерінің сүйікті мультфильмдерін тек теледидар экранынан емес, сонымен бірге кинозалда достарымен және отбасымен бірге тамашалай алады.
Енді қордайлықтар премьералар мен танымал фильмдерді ауылдан шықпай-ақ көре алады. Апта сайын «Qorday Cinema» көрермендерін отандық және әлемдік фильмдердің жаңа көрсетілімдерімен қуантуға ниеттеніп отыр.
