28 наурызда Қордай аудандық мәслихатының кезекті сессиясы өтті. Оның жұмысына Қордай аудандық мәслихатының төрағасы Нұрдин Садықов, депутаттармен қатар аудан әкімінің орынбасары Жұлдызбек Бақаев, аудан әкімдігі бөлімдерінің басшылары, ауылдық округ әкімдері қатысты.
Депутаттар күн тәртібіндегі «Қор-дай ауданы әкімдігінің шаруашылық жүргізу құқығындағы коммуналдық мемлекеттік кәсіпорнының қызметі туралы» мәселесін қарастырды. Бұл жөнінде тұрғын үй-коммуналдық шаруашылық кәсіпорнының атқару-шы директорының міндетін Қуаныш Байжігітов баяндама жасады.
Талқылау барысында депутаттар атқарылған жұмыстарға қарамастан, 2023 жылғы 7 қыркүйектегі №9-3 «Аудандағы мектептердің жылыту жүйесінің жағдайы және олардың қысқа дайындығы туралы» аудандық мәслихат шешімінде көрсетілген ұсыныстардың орындалмағанын атап өтті.
Мәселен, жылыту жүйелерінің баланстық тиесілігі нақты емес: мектептерде жылыту жүйесі болса, қазандықтар тұрғын үй-коммуналдық шаруашылықтың қарауында. Мұғалімдер маман болмағандықтан, жылыту жүйесіндегі ақауларды жоя алмайды, сондықтан ауа жиналу (воздушная пробка) салдарынан барлық сыныптар мен қабаттарда температура біркелкі емес. «Отар» аймағындағы мектептерде жылыту жүйелеріндегі клапандарды тексеру, қозғалтқыштар мен сорғылардың мойынтіректерін (подшипник) майлау және тексеру, сальниктерді ауыстыру, газ және су есептегіштерін тексеру жұмыстары жүргізілмеген. Көмірмен жылытылатын мектеп қазандықтарының маңында өткен жылыту маусымынан қалған күл-қоқыс тау болып үйіліп қалған. қазандықтардың аумақтары абаттандырылмаған, шөп орылмаған, қоқыс тазаланбаған. Кейбір мектептерде сапасыз көмір пайдаланылуда, бұл жылыту тиімділігін төмендетіп, қосымша шығындарға әкелуде.
Автожолдар жағдайы бойынша да сессияда бірқатар кемшін тұстар айтылды.
Мысалы, 2024 жылы Отар-Үлкен Сұлутор-Көктөбе бағытындағы 16 шақырымдық аудандық жолды орташа жөндеуге қаражат бөлінді. Жоба құны – 554 млн теңге, келісімшарт құны – 537 млн теңге. Қазіргі уақытта тек 10 шқ жол салынған. Жаңа асфальтта қазірдің өзінде жарықшақтар пайда болған, қалыңдығы нормативке сай емес. Мердігер мен техникалық қадағалау тиісті деңгейде жұмыс атқармаған.
Көпқабатты үйлердегі жылу мәселесі де назардан тыс қалмады. Қордай ауылындағы кейбір көпқабатты үйлерде пәтерлер арасында жылу біркелкі таралмайды. Бір пәтерде өте ыстық, екіншісінде суық. Жібек жолы көшесіндегі 5 қабатты үйдің қазандығы аумағы ластанған, қоқыс, полиэтилен пакеттер, пластик бөтелкелер шашылып жатыр.
Қорытындылай келе, барлық мәселелер жан-жақты талқыланып, депутаттар тиісті шешім қабылдады.
