«Жолбарыстай қайратты,
Қырандай күшті қанатты,
Мен жастарға сенемін» – деген өлең жолдарынан Мағжан Жұмабаев атамыздың келешек жастардан көп үміт күткені көрініп-ақ тұр. Шоқтығы биік шығармаларының ішінде «Мен жастарға сенемін» өлеңінің мазмұнында нағыз патриотқа тән бүтін болмыс пен риясыз сенім жатыр.
Ағымдағы жылдың қыркүйек айының 15-і күні аудандық аумақтық сайлау комиссиясы жанынан Жас сайлаушылар клубы құрылған болатын. Бұл клуб – жастардың саяси мәдениетін қалыптастыруға, сайлау процесінің мәнін түсінуге және қоғамдағы өз орнын айқындауға бағытталған тың бастама болып табылады.
Бұл ретте, Қордай аудандық Мәдениет үйінде аудандық сайлау комиссиясы жанынан құрылған жас сайлаушылар клубының алғашқы форумы өтті.
Форумға аудан әкімінің орынбасары Бақыт Сахатов, аудандық аумақтық сайлау комиссиясының төрағасы Асылбек Сырлыбаев, Жамбыл облыстық сайлау комиссиясының хатшысы Әбілхайыр Боранбаев, сондай-ақ, Жас сайлаушылар клубының төрайымы Карима Ахан қатысып, жастарға сайлаудың маңыздылығы жөнінде баяндама жасады.
Шараны аудандық аумақтық сайлау комиссиясының төрағасы Асылбек Сырлыбаев ашып берді. Ол шараның жастар арасында саяси мәдениетті насихаттау мен азаматтық белсенділікті арттырудағы маңыздылығын атап өтті. Өз сөзінде Асылбек Төреханұлы форумның жастар үшін үлкен мүмкіндік екенін және сайлау процесінің түсінігін кеңейту мақсатында құрылғанын жеткізді.
Содан кейін, аудан әкімінің орынбасары Бақыт Оңласынұлы да жастардың саяси өмірдегі рөлін, әсіресе алдағы сайлауларда дауыс беру құқығының маңыздылығын баса айтты.
«Құрметті жастар! Мемлекет басшысы Қасым – Жомарт Тоқаев елімізде ауқымды саяси жаңғыру жүргізіп, демократиялық институттарды нығайтуға, олардың қоғам өміріне қатысу мәдениетін арттыруға ерекше мән беріп келеді. Әсіресе, Президентіміздің «Халық үніне құлақ асатын мемлекет», «Әділетті Қазақстан» қағидаттары – әрбір азаматтың, жастардың пікірін ескеруге, қоғамдық мәселелерге белсенді араласуына мүмкіндік беретін маңызды бағыттар.
Бүгінгі форум – осы реформалар мен бастамалардың жалғасы.
Қордай ауданының жастары әрқашан белсенділігімен, жаңашылдығымен ерекшеленіп келеді. Сондықтан біз сіздердің бастамаларыңызды қолдауға, идеяларыңызды дамытуға әрдайым дайынбыз», — деді аудан әкімінің орынбасары.
Келесі сөз кезегі «Береке» Гуманитарлы-техникалық колледжінің оқытушысы, Жас сайлаушылар клубының төрайымы Карима Аханға ұсынылды.
«Сайлау – бұл кез келген демократиялық қоғамның негізгі тірегі. Бұл азаматтардың өз елінің болашағын айқындауға тікелей қатысуына мүмкіндік беретін аса маңызды құқықтық және саяси үдеріс. Осы үдерістегі жастардың рөлі ерекше. Себебі, олар – ертеңгі күннің көшбасшылары, еліміздің негізгі қозғаушы күші.
Қазіргі жастар арасында сайлау жүйесіне деген білім деңгейінің жеткіліксіздігі байқалады. Осы олқылықтардың орнын толтыру және жастардың азаматтық белсенділігін арттыру мақсатында «Жас сайлаушылар клубы» секілді бастамалардың маңызы зор», — деді ол өз баяндамасында.
Форумның негізгі мақсаты – жастардың азаматтық белсенділігін арттыру, сайлау мәдениетін қалыптастыру және әрбір жастың дауыс беру құқығының мәнін түсіндіру болды.
Іс-шара барысында студенттерге сайлау процесі туралы жан-жақты ақпарат беріліп, арнайы көріністер көрсетілді. Соңында қатысушылар арасында сауалнама жүргізілді. Форум жастардың қоғам өміріне белсенді қатысуына, азаматтық жауапкершілікті сезінуіне және саналы шешім қабылдауына тың серпін берді.
Әділет ҚҰТТЫБАЙ
