Көктемнің шырайлы мерекесі – Ұлыстың ұлы күні қарсаңында ауданымызда жақсылыққа негізделген игі шаралар ұйымдастырылуда. 17 наурыз – Мәдениет және ұлттық салт-дәстүр күні аясында Масаншы ауылының белсенді жастары «Наурыз базарлық» акциясын өткізіп, мейірімділік пен қамқорлықтың жарқын үлгісін көрсетті.
Шара барысында жастар Қордай аудандық мүгедек балаларды оңалту және бейімдеу орталығы мен аудандық тұрмыстық зорлық-зомбылық құрбандарына әлеуметтік көмек көрсету орталығына барып, қызмет алушылар мен қызметкерлерге көтеріңкі көңіл-күй сыйлады.
Алдымен аудандық дағдарыс орталығына ат басын бұрған жастар тобы ондағы жандарға арнайы әзірлеген базарлықтарын тарту етті. Ізгі шараға аудан әкімінің орынбасары Дамира Сүгірбай да қатысып, мұндай бастамалардың қоғамдағы мейірімділік пен ауызбіршілікті нығайтудағы маңызын атап өтті.
Кейін жастар мүгедек балаларды оңалту және бейімдеу орталығына келді. Қонақтарды орталық директоры Эльнура Мінісқұлова құшақ жая қарсы алып, жастардың қамқорлығына алғысын білдірді. Белсенділер ерекше балаларға дайындаған базарлықтарын табыстап, ізгі тілектерін арнады. Өз кезегінде орталық ұжымы да ақжарма алғысын жеткізіп, осындай қайырымды шаралардың жалғасын табуына тілектестік білдірді.
