Жұма күнгі есептік кездесу Ноғайбай ауылында жалғасты. Рза Құнақова атындағы №35 орта мектебінде өткен жиынға тұрғындар көп жиналды. Есептік кездесу басында ауылдық округ әкімі Е.Ешмұраттың баяндамасы тыңдалды.
Ауыл әкімінің баяндамасы бойынша өткен жылғы бюджет елді мекендерді күтіп ұстауға, Сарыбастау ауылының саябағына сахна орнатуға, Ноғайбай ауылында шағын футбол алаңшасы мен стрит воркаут тренажерларын ортануға, Шарбақты ауылындағы Ноғайбай би көшесін жөндеуге, «Ауыл ел бесігі» бағдарламасы бойынша Ноғайбай ауылы Асыраубаева, Мамыр, Қожахметұлы, Төле би көшелеріне орташа жөндеу жұмыстарын жүргізуге және тағы басқа да жұмыстарға жұмсалды. Ноғайбай ауылы өткен жылы толығымен ауыз су жүйесімен қамтылса, газдандыру жұмысы да жақсы жолға қайылған.
Аудан әкімі кездесу барысында өткен жылы атқарылған жұмыстардың есебін берді. Өткен жылы аудан аумағында бірнеше маңызды инфрақұрылымдық жобалар іске асырылғанын атап өтті. Жолдарды жөндеу, жаңа мектептер мен ауруханалар салу, тұрғын үй құрылысын дамыту – бұл жұмыстардың барлығы халықтың өмір сапасын жақсартуға бағытталған.
Аудан әкімі халыққа есеп беру кезінде тек өткен жылдың нәтижелерімен ғана шектеліп қоймай, алдағы уақытта атқарылатын жоспарларды да жария етті. Әкімнің айтуынша, алдағы уақытта округте жастардың бос уақытын тиімді пайдалану мақсаты басты назарда болады. Жаңа ойын алаңы, спорттық алаң салынады. Сондай-ақ, ауыл шаруашылығын дамыту бойынша да нақты жоспарлар бар. Мәселен, алдағы бірер жылда Ноғайбайда үлкен су қоймасының құрылысы жоспарда бар. Бұл үлкен жоба іске асқанда суармалы жерлердің үлесі едәуір өсіп, күндерін ауыл шаруашылығымен көріп жүрген тұрғындарға айтарлықтай көмек болары сөзсіз.
Кездесу барысында халықтың көптеген сұрақтары қойылды. Олардың ішінде инфрақұрылымды дамыту, білім, мәдениет және денсаулық сақтау саласындағы мәселелер, өзге де ұсыныстар болды. Әкім халықтың ұсыныстарын тыңдай отырып, әрқайсысына жеке жауап беріп, бұл мәселелердің шешілу жолдарын түсіндірді.
Аудан әкімімен өткен бұл кездесу халық пен билік арасында тікелей байланыс орнатудың маңызды қадамы болды. Тұрғындардың сұрақтарына жауап беру, олардың проблемаларын тыңдап, шешу жолдарын қарастыру – бұл ауданның дамуына оң ықпал етеді. Әкімнің халыққа ашықтық танытып, есеп беруі ауданның басқару жүйесін жақсарту мен қоғамның әрбір мүшесінің мүдделерін қорғау тұрғысынан маңызды бастама болып табылады. Жалпы, аудан әкімі халықпен тығыз қарым-қатынас орнатып, халықтың өмір сапасын арттыруға бағытталған жұмыстарды жалғастырады деп күтілуде.
