Гвардейск гарнизонында орналасқан Орталық спорт клубының спорт кешенінде әскери қызметшілер арасында «Оңтүстік» өңірлік қолбасшылығының самбодан чемпионаты өтті.
Жарыс қорытындысы бойынша командалық есепте «алтынды» Қызылорда гарнизоны барлау полкының құрама командасы жеңіп алды. «Күміс» жүлде Тараз гарнизонының 5-механикаландырылған бригадасына бұйырды. «Қоланы» Сарыөзек гарнизонының артиллериялық бригадасы иеленді.
Чемпионаттың бас төрешісі, «Оңтүстік» өңірлік қолбасшылығының дене шынықтыру және спорт бөлімінің бастығы, подполковник Мадияр Бабаханов жарысқа қатысушылардың жоғары дайындық деңгейін атап өтті.
– Самбо әскери әскери қызметшілердің сүйікті спорт түріне айналды. Бұл жарыстар – спорт шеберлігін көрсету ғана емес, сонымен қатар әскери қызметшілерді дайындаудың маңызды бөлігі. Себебі, самбо шыдамдылықты, ерік-жігерді дамытып, жауынгерлік дағдыларды жетілдіруге көмектеседі. Біздің спортшылардың прогрессін байқап отырмыз, бұл бізді мұндай чемпионаттарды жиі өткізуге ынталандырады, – деді ол.
Атап өтсек, жарысқа 10 командадан 110 спортшы қатысты. Жеке біріншілік нәтижелері бойынша:
— 58 кг салмақ дәрежесінде чемпион – Шымкент гарнизонының 35748 әскери бөлімінің қатардағы жауынгері Қуаныш Сұлтан;
— 64 кг салмақта – Қызылорда гарнизонының 66597 әскери бөлімінен ефрейтор Ердәулет Нұрмағанбетов;
— 71 кг салмақта – Гвардия гарнизонының 21450 әскери бөлімінен қатардағы жауынгер Елбол Хамза;
— 79 кг және 88 кг салмақ дәрежелерінде Қызылорда гарнизонының 66597 әскери бөлімінен кіші ефрейтор Қайрат Тұраков пен аға сержант Бекзат Тәліпов жеңімпаз атанды;
— 98 кг салмақта чемпион – Луговой гарнизонының сержанты Шамхат Әмірқұл;
— 98 кг-нан жоғары салмақ дәрежесінде Луговой гарнизонының ефрейторы Ертуған Торенов жеңіс тұғырынан көрінді.
– Мұндай чемпионатқа қатысу мен үшін үлкен мәртебе. Мұндағы әр жекпе-жек – тәжірибе жинау, өз күшіңді сынап, қабілеттеріңді көрсету мүмкіндігі. Өз командамды танытқаным үшін мақтанамын және жаңа жеңістерге ұмтыламын, – деді мерзімді әскери қызметші Елбол Хамза.
Чемпионат жеңімпаздары мен жүлдегерлері кубоктармен, медальдармен және дипломдармен марапатталды.
