Олардың сөздік қорында «шамамен», «болжаммен» деген сөздер жоқ. Оларға мүлдем қателесуге болмайды, бұл адамдар өмірімізді әсірелемей, дәлме-дәл сипаттайды. Иә, біз сөз еткелі отырған азаматтар – статистика мамандары.
Статистиканың кез келген аудан, облыс, жалпы еліміз үшін маңызы зор. Себебі, қай сала болмасын уақтылы және нақты ақпаратты қажет етеді. Ал статистика басқармасы барлық саланы толық, шынайы және жедел статистикалық ақпаратпен қамтиды. Осыдан-ақ бұл сала қызметкерлеріне артылған жауапкершіліктің жоғары екендігін аңғаруға болады.
Мемлекеттік қызметкерлердің кәсіби мерекесі қарсаңында осындай маңызды салада елеулі еңбек етіп жүрген Қордай ауданынының Статистика басқармасының қызметкелері жайында қалам тербеуді жөн көрдік.
Қордай ауданының Статистика басқармасы — Қазақстан Республикасының Стратегиялық жоспарлау және реформалар агенттігі Ұлттық статистика бюросының Жамбыл облысы бойынша департаментінің құрылымдық басқармасы болып табылады.
Мемлекеттік статистика саласындағы нормативтік-құқықтық актілерге, әдістемелік нұсқаулықтарға сәйкес, статистикалық көрсеткіштерді жинау, өңдеу және қалыптастыру, орындалатын жұмыстардың сапасын арттыру, статистикалық ақпаратты тұтынушылардың қанағаттанушылық деңгейін арттыру мақсатындағы әрекеттердің нәтижелігін күшейту – басқарманың негізгі міндеттеріне жатады. Қордай аудандық статистика басқармасында қазіргі уақытта 7 адам жұмыс істейді, барлығы білімді, мемлекеттік қызметші деген мерейлі міндетті абыроймен алып жүрген жандар. Сонымен қатар, келісімшарт бойынша жұмыс істеп жүрген интервьюерлер де бар. Тек қана нәзік жанды арулардан құралған ұжым өздерінің күнделікті жұмысында қарапайымдылық, әділдік, адалдық сияқты принциптерді берік ұстанады.
Басқарманы әр жылдары өз міндетін мінсіз атқарған, білікті азаматшалар басқарып келді. Бұл ретте мекемеге 20 жылдан астам уақыт басшылық еткен ауданымыздың «Құрметті азаматы» Алмакүл Жамбаеваның, одан кейін басшы болған Гүлжанат Сейдалиеваның орны ерек. Қазіргі басшысы Венера Темірованың іскерлік, ұйымдастырушылық қабілеттерінің арқасында ұжымда тату қарым-қатынас орнаған. Венера Нұрмахамбетқызы жетекшілік ететін ұжымның барлық мамандарын алдағы кәсіби мерекелерімен құттықтап, қызметте мерейлеріңіз өсе берсін демекпіз.
Сәуле Мұхадинқызы
