Бұл жоба этностар көп шоғырланған елді мекендерде тұрғындардың өзекті мәселелерін анықтап, мемлекеттік саясатты түсіндіру және қоғамдық диалогты дамыту мақсатын көздейді. Жаңатас қаласы мен Арыстан, Саудакент ауылдарында өткен кездесулер осы бағыттағы жұмыстардың тиімділігін айқын көрсетті.
Жобаны жүзеге асыру үшін құрылған «Этносаралық және конфессияаралық келісім» тобының құрамына облыстық «Қоғамдық келісім» мекемесінің басшысы Мубарак Жинақбаева, Жамбыл облысы қорғаныс істері жөніндегі департамент өкілі, лейтенант Ербол Бекмаханов және Сарысу ауданы әкімінің орынбасары Ерлан Ермахаов кірді. Бұл топ тұрғындармен кездесулер өткізіп, олардың тілектері мен ұсыныстарын тыңдады, сондай-ақ мемлекеттік саясатты түсіндіру бойынша ақпараттық жұмыстар жүргізді.
Кездесулерде Қазақстан халқы Ассамблеясының «Бірлік пен келісім жолындағы 30 жыл» атты XXXIV сессиясының шешімдері талқыланды. Мубарак Жинақбаева аймақтық Ассамблеяның жобалары мен мақсаттары туралы кеңінен баяндаса, аудандық прокуратура өкілдері заңнамалық түсіндіру жұмыстарын жүргізді. Бұл кездесулер тұрғындардың құқықтық сауаттылығын арттыруға және этносаралық келісімді нығайтуға ықпал етті.
Кездесулердің ерекше сәттерінің бірі – «Манас» қырғыз этномәдени бірлестігінің жетекшісі Алтай Сатыбековтің сөзі болды. Ол аудандағы этностардың тыныс-тіршілігі туралы баяндап, жүрекжарды өлеңін арнады. Бұл этностардың мәдени байлығы мен бірлігін паш ететін маңызды сәт болды. Сондай-ақ, кездесулерде тұрғындардың түрлі мәселелері талқыланып, оларды шешу жолдары қарастырылды.
Сарысу ауданындағы «Бейбітшілік пен келісім» жобасы этносаралық татулықты нығайтуда маңызды қадам болып табылады. Жұмыс тобының белсенді қызметі, тұрғындармен ашық диалог және мәдени байланыстарды дамытуға бағытталған шаралар ауданның әлеуметтік-мәдени өмірін байытып, бірлік пен өзара түсіністіктің берік негізін қалайды.
