«Халық үніне құлақ асатын мемлекет» тұжырымдамасы – бұл ел Президенті Қасым-Жомарт Тоқаевтың Қазақстан халқына арнаған Жолдауына арқау болған бағыттардың бірі. Мемлекет басшысының бұл тұжырымдамасы көптеген мәселеге қозғау салып, қалың ел тарапынан қолдау тауып отыр.
Аталған тұжырымдаманы орындау мақсатында аудан әкімі Рүстем Дәулет бастаған басшылық өкілдері тұрғындарды қабылдау жұмыстарын жалғастыруда. Айта кетсек, 15-19 маусым аралығында бірнеше ауылдық округте қоғамдық көшпелі қабылдаулар ұйымдастырылып, азаматтардың құқықтары мен бостандықтарын қорғау, халықтың тұрмыс сапасын жақсарту сынды өзекті мәселелер тыңдалды.
Қордай ауданының әкімі Р.Дәулет бастаған көшпелі қоғамдық қабылдау тобы бір апта бойы Сарыбұлақ, Бетқайнар, Қақпатас, Жамбыл және Степной ауылдарының тұрғындарымен кездесіп, толғандырған сұрақтарына жауап беріп, зерделеуді қажет ететін мәселелерді бақылауға алды.
Көшпелі қоғамдық қабылдау жұмысына аудан прокуроры Н.Ұласбек, аудандық мәслихаттың хатшысы Р.Нұрсипатов, аудандық полиция бөлімінің бастығы М.Ережепов, халыққа қызмет көрсету орталығының директоры М.Сарманов, аудандық орталық аурухананың бас дәрігері З.Қадырбекова мен аудан әкімдігінің салалық бөлім және мекеме басшылары қатысып, тұрғындардың көтерген мәселелеріне жауап берді. Жалпы, қоғамдық қабылдауға 300-ге жуық ауыл тұрғыны қайырылып, басым көпшілігінің сұрағына заң аясында түсініктеме берілсе, бірқатар мәселелер аудан әкімінің жекелей бақылауына алынды.
Қоғамдық қабылдауда тұрғындардың сауалы негізінен әлеуметтік жәрдемақы, кәсіпкерлікті дамыту, баспанаға қол жеткізу, ауыз су және суармалы су, жайылым жерлер, ауылдың инфрақұрылымын нығайту сияқты мәселелерге қатысты болды. Алдағы уақытта бұл азаматтардың мәселелері басты назарда болады. Ел игілігі үшін ұйымдастырылатын мұндай қоғамдық қабылдаулар өз жалғасын табады.
Ауданда карантин режимі алынғанымен, сақтық шараларының сақталғандығы ескеріліп, бес ауылда өткен кездесулерде қауіпсіздік шаралары қатаң сақталған.
