Наурыз — күллі түркі халықтарының, оның ішінде қазақ халқының да маңызды мерекелерінің бірі. Әр жыл сайын көктемнің алғашқы күндерінде тойланатын бұл мереке дәстүр мен салтты сақтай отырып, ұрпақтан-ұрпаққа берілетін ұлы қуаныш пен ізгіліктің символы болып табылады. Осы айтулы мереке аясында, Қордай ауылында орналасқан «Айналайын» балабақшасында «Төрлет, төрлет Наурыз!» атты мерекелік іс-шара өткізілді.
Балабақша қызметкерлері наурыз-көже пісіріп, келген қонақтарды ерекше құшақ жая қарсы алды. Балалар ұлттық ойындар ойнап, би билеп, ән айтып, жұртшылыққа қуаныш сыйлады.
«Төрлет, төрлет Наурыз!» мерекесінің басты мақсаты – балаларға қазақ халқының мейрамының маңызын түсіндіру, ұлттық салт-дәстүрлерді таныту және олардың шығармашылық қабілеттерін дамыту. Сондай-ақ, балаларды ұлттың мәдениеті мен өнеріне құрметпен қарауға тәрбиелеу де шараның негізгі бағыттарының бірі болды.
Наурыз мерекесіне арналған ертеңгіліктің шымылдығын «Жұлдызша» қазақ ересек тобы ашты. Мереке барысында балалар қазақтың ұлттық ойындарын ойнап, «Арқан тарту», «Қыз қуу» сияқты дәстүрлі ойындармен танысты. Сонымен қатар, балалар қазақтың ұлттық тағамдары туралы да білді, наурыз көже мен басқа да тағамдарды дайындау рәсімдерін көріп, ұлттық ас мәзірімен танысты.
Мерекелік бағдарламада балалардың өнері негізгі орын алды. Олар Наурыздың құндылықтарын өз өнері арқылы жеткізді. Балалар ақындардың өлеңдерін жаттап, Наурыз туралы өлеңдер айтып, «Наурыз келді», «Дастархан», «Топжарған» атты әндерін орындап, «Келіншек биі», «Қамшы» және «Флешмоб» билерін биледі. Қуанышқа толы әсем әндер мен би билер мерекенің ажарын ашып, көрермендерге көңілді көңіл-күй сыйлады.
Сонымен қатар, мереке барысында балаларға қонаққа әже, келіні және немересі ауылдан келіп, балалардың өнерлерін тамашалап, әже ақ батасын беріп, немересінің қазақтың керемет ұлттық салт-дәстүрі бойынша келген қонақтар – аудандық білім бөлімінің әдіскері Раушан Әмреева мен Қордай ауылдық округі әкімінің орынбасары Мейрхан Оналбаев тұсауын кесті.
Содан соң «Тамшы» ересек орыс тобы өнерлерін көрсетті. Өзге ұлт өкілдерінің бүлдіршіндері қазақша тақпақ, әндерін айтып, қонақтарды қуантты. Балаларға қонаққа арнайы «Алдар көсе» және «Бай» кейіпкерлері келіп, ертеңгілікті әбден жандандырды. Балалар оларға «Қамшы», «Шашу», «Калинка» билерін билеп, «Асық», «Қол күрес», «Киіз үй» ұлттық ойындарын ойнады.
«Айналайын» балабақшасындағы «Төрлет, төрлет Наурыз!» мерекесі балалар үшін тамаша естеліктер мен көңілді сәттерге толы болды. Бұл шара қазақ халқының Наурыз мейрамын ұрпақтан-ұрпаққа жеткізу, ұлттық рухты көтеру және балалардың мәдениетке деген қызығушылығын арттыру мақсатында ұйымдастырылды. Мереке барысында балалардың шығармашылығы мен өнері ұлықталып, Наурыздың құндылықтары кеңінен насихатталды.
Мұндай шаралар болашақ ұрпақты тәрбиелеуде үлкен маңызға ие, себебі олар өз халқының тарихы мен мәдениетін біле отырып, оны болашақта да ұрпақтан-ұрпаққа жеткізуді үйренеді.
Мадина УЗБЕКОВА
