2025 жыл елімізде Жұмысшы мамандықтар жылы деп жарияланды. Бұл жыл – еңбектің қадірін арттырып, шынайы кәсіп иелерін қолдау жылы.
Біз, редакция тілшілері, аудандық тұрғын-үй коммуналдық шаруашылық жөніндегі кәсіпорнының жүк көлігінің жүргізушісі Жақсылық Мадыбаев жайында әңгімелекпіз.
Оның жұмысы құрылыс пен өндірістегі маңызды процестерге үлкен әсер етеді. Ауыр техникалардың, әсіресе жүк көліктерінің рөлі, бүгінгі күнде ерекше. Жүк көлігі жүргізушілері – тұтас бір жобаның алғы шебінде жүріп, жұмыстардың уақытында әрі сапалы орындалуын қамтамасыз етеді.
Жақсылық Талғатұлы – Үлкен Сұлутөр ауылының тумасы. Ол мектеп қабырғасында жүргеннен-ақ, ауыр техникалардың қыр-сырын меңгеруге күш салды. Жас кезінде жүргізуші болу арманы оны кәсіби жолда үнемі алға жетелеп отырды. Бүгінде ол маман ретінде аудандық кәсіпорынның мақтанышына айналған.
Еңбек жолын, 2009 жылы «Сұлутөр» жауапкершілігі шектеулі серіктестігінің жүргізушісі болып бастап, 2019 жылға дейін тәжірибе жинады. Ал, 2023 жылдан бері тұрғын-үй коммуналдық шаруашылығының жүк көлігінің жүргізушісі лауазымында.
Оның негізгі міндеттері – құрылыс алаңдарына материалдарды уақытында жеткізіп, ауыр техникалармен жұмыс жүргізу. Осылайша, ол тәжірибесін арттырып, өзінің жұмысын шебер орындауға қол жеткізді.
Жақсылық Талғатұлының жұмысы – тек жүк көлігін жүргізумен шектелмейді. Ол өз қызметінде қауіпсіздік ережелерін қатаң сақтайды. Сонымен қатар, әрбір сапар алдында, көліктің техникалық жағдайын тексеріп, маршрутын алдын ала жоспарлайды. Бұл оның кәсіби шеберлігінің бір бөлігі.
Жұмыстағы қиындықтар, әсіресе ағымдағы ауа райы, жол жағдайлары – кейіпкеріміз үшін ерекше сынақ. Бірақ, ол әрдайым оң көзқарас танытып, алдындағы міндетті абыроймен атқаруға тырысады. Оның шыдамдылығы мен еңбексүйгіштігі жұмыс нәтижесінде көрініс табады.
Бұл жыл еліміздегі еңбекке құштар жастарға, кәсіп иелеріне зор мүмкіндіктер ұсынуда.
Бұл жылда, Жақсылық Мадыбаев сияқты еңбекқор адамдардың еңбегін мақтан тұтып, қоғамда кәсіби мамандарына ерекше көңіл бөлінсе, отанымыздың дамуы мен гүлденуіне зор серпін беретіні сөзсіз. Еліміздегі өндіріс пен қызмет көрсету секторындағы сапаны арттырудың, елді дамыту мен жігерлендірудің нақты мүмкіндіктері барына сенімдіміз.
Әділет ҚҰТТЫБАЙ
