Күнбатыс-2 ауылының жастары туған жеріне деген құрметін іс жүзінде дәлелдеп, ауылдың кіреберісіне әсем де еңселі арка орнатты. Бұл игі бастама – ауыл жастарының ұйымшылдығы мен ауызбіршілігінің жарқын көрінісі. Олар тек сөзбен емес, нақты әрекеттерімен туған ауылын көркейтуге белсенді атсалысып, болашақ ұрпаққа үлгі көрсетті.
Ауылдың кіреберісінде бой көтерген бұл арка ауылдың көркін айшықтап қана қоймай, алыстан ат терлетіп келген қонақтарға ерекше әсер сыйлары анық. Арка – кез келген елді мекеннің бет-бейнесі, сол ауылдың айнасы іспетті. Оның ұлттық нақышта безендірілуі ауылдың салт-дәстүрге деген құрметін аңғартады.
Бұл жобаны жүзеге асыру үшін жастар өзара келісіп, қажетті қаражат пен құрылыс материалдарын жинады. Олардың бастамасын ауыл ақсақалдары мен жергілікті тұрғындар қызу қолдап, өз үлестерін қосты. Құрылыс жұмыстарына ауыл азаматтары жұмылып, бірі қолымен көмек көрсетсе, енді бірі материалдық жағынан қолдау білдірді. Осындай ынтымақтың нәтижесінде ауылдың кіреберісінде сәнді, заманауи және ұлттық нақыштағы арка бой көтерді.
Ауыл тұрғындары үшін бұл арка тек сәндік құрылыс қана емес, туған жерге деген сүйіспеншіліктің, бірлік пен берекенің символына айналды. Мұндай игі істер алдағы уақытта да жалғасын тауып, ауылдың гүлденуіне себепкер боларына сенім мол. Күнбатыс-2 ауылының жастары бұл бастамамен тоқтап қалмай, алдағы уақытта туған жерді абаттандыруға қатысты жаңа жобаларды қолға алмақ.
Бұл іс-шара ауыл жастарының туған өлкеге деген жанашырлығын көрсетіп қана қоймай, басқа ауылдарға да үлгі болары сөзсіз. Мұндай бастамалар елді мекендердің көркеюіне, дамуына зор үлес қосатыны анық.
Жандос ОМАРОВ
