Бурабайда өткен Ұлттық құрылтайдың IV отырысында Мемлекет басшысы ел дамуының басты реформаларына тоқталып қана қоймай, қоғамда кеңінен талқыланып жүрген маңызды мәселелерді де көтерді. Соның ішінде мемлекеттік наградаларға қатысты айтқан пікірі өте орынды.
Президент Қасым-Жомарт Тоқаев: «Біз соңғы жылдары мемлекеттік наградалар мәселесін қайта қарап, бір жүйеге түсірдік. Енді ведомстволық (мекемелік) марапаттарды ретке келтіру қажет. Мемлекеттік органдар бұл жұмысты назардан тыс қалдырды. Нақты ереже жоқ, бәріне ортақ мәліметтер қоры да жоқ. Соның кесірінен кейбір марапаттар орынсыз таратылып жатыр. Тіпті, бір мемлекеттік органның төсбелгісін бір адам бірнеше рет алған жайттар да кездеседі», – деп атап өтті.
Шынында да, ведомстволық марапаттар – кәсіби шеберлікті мойындаудың маңызды белгісі. Ол тек білікті, еңбегі сіңген мамандарға берілуі тиіс. Алайда жүйесіздік салдарынан мұндай наградалар өз құнын жоғалтып барады. Сондықтан мекемелік марапаттардың бірыңғай стандартын жасап, нақты тізімін бекіту қажет. Әр салада өзіндік ерекшеліктер болғанымен, бәріне ортақ ұстаным болуы тиіс.
Құрылтайда көтерілген бұл мәселені құзырлы органдар елеусіз қалдырмай, жүйелі шешім қабылдайды деп сенемін. Награданың шынайы мәртебесін қайтару – еңбектің әділ бағалануының кепілі.
Қарлығаш ҚЫПШАҚБАЕВА, аудандық білім беру қызметкерлері кәсіподақ комитетінің төрайымы
