Адамның тағдыры калейдоскоп сияқты, кейде жарқын суретті көру үшін қараңғылыққа үңілуге тура келеді немесе біздің кейіпкеріміздей, тамаша әуенді есту үшін толығымен тыныштықта болу керек. Қордайлық Мұрат Жолдасбаевтың музыкаға деген сүйіспеншілігіне есту қабілетінің толық жоғалуы да кедергі бола алмады.
Оның қолындағы гитараға жан бітіп, синтезатордың қаншалықты сезімтал дыбыстай бастайтынын көргенде, ақ-қара пернелерді саусақтарымен соншалықты шебер ұстаған адамның шынайы әлемде ештеңе естімейтініне сену қиын. Осыдан көптеген жылдар бұрын музыкалық білімі бар, жан-тәнімен әсем әуен әлеміне берілген ер азаматқа қорқынышты диагноз қойылды — есту қабілетінің жоғалуы.
Мұрат Сматайұлы бес жасында музыка әлемімен ерекше байланысты сезініп, уақыт өте оның қызығушылығы арта түсті. Ол баян мен гитарада ойнауды өз бетінше үйренді. Мұндай құлшыныс елеусіз қалмады. Содан жас жігітті қазіргі Сұлутөр ауылындағы клубқа жұмысқа алады. Сонымен, өткен ғасырдың 70-жылдарының басында Мұрат Жолдасбаев кәсіби музыкант ретінде өз жолын бастады. Жас жігіт бос уақытының барлығын үйірмеде әуен үйреніп, аккорд таңдаумен өткізетін. Күрделі де қызықты процесс оны таң қалдыратын. Сол уақыттары құрылған «Таугүл» ансамблін оның шығармашылық ізденістерінің жемісі деуге болады. Мұрат Жолдасбаев вокалды-аспапбы ансамбльдің идеялық дем берушілердің біріне айналды.
1976 жылы құрылған ансамбльдің құрамы бірнеше талантты дарындармен толықты, олардың қатарына Борис Жарқымбаев, Мұрат Жолдасбаев, Мұрат Тұрысбеков, Керімқұл Қанарбаев, Людмила Нудьга, Светлана Галушкина және Валентина Ткачева болды. Айтпақшы, ауылдағы музыканттар ауданнан тысқары жерлерде де таныла бастады. Топ топ жарып, елге танылып, репертуарын үнемі жаңартып отырды. Жылдар өтті, басымдықтар өзгерді, қиын күндер келді, бірақ біздің кейіпкеріміз үшін жеті нотаға деген махаббат өзгеріссіз қалды. Мүгедектігіне қарамастан, кәсіби қызметін жалғастырып, дәрігерлердің қойған диагнозына қарамастан, Мұрат Сматайұлы хоббиінен бас тарта алмады. «Өмір мен музыка арасында таңдау жасау керек болса, мен музыканы таңдаймын», — деп үнемі айтып жүретін. Тағдыр осылай оның өмірін музыкамен байланыстырды.
Айтпақшы, ол тапқан ақшасының барлығын дерлік жаңа аспаптар, құрал-жабдықтар, арнайы құлаққаптар алуға жұмсайды. Ер азамат үйіндегі бөлмелердің бірін студия етіп жабдықтап та қойған. Бос уақытының барлығын жас кезіндегідей өткізеді. Музыканттың репертуарында кеңестік эстраданың ретро-хиттері бар, дегенмен ол заманауи трендтерге ілесуге тырысады. Музыкасы жан дүниесінде жаңғырып тұратын сүйікті композиторларының бірі Шәмші Қалдаяқов болды және солай болып қала береді.
Музыкант тек отбасылық мерекелерде өнер көрсетіп, әсем әуен орындап, тек өз туыстарына арнап ән шырқайды. Айтпақшы, оның жанұясы музыканттың хоббиін толығымен қолдайды және оның талантын дамытуға барынша көмектесуге тырысады. Дегенмен, әрбір ереженің ерекшелігі болады емес пе. Өткен сенбіде Мұрат Жолдасбаев, Борис Жарқымбаев, Фарида Меңдібаева, Еркін Сәрсенбаевтар Сұлутөр ауылында өнер көрсетіп, нағыз мереке ұйымдастырды. Көптен күткен концерт «Таугүл» ансамблі өнер сапарын бастаған жергілікті мәдениет үйінде өтті. Музыканттар мұқият дайындалып, арнайы репертуар таңдап, қобалжыды. Бірнеше ондаған жылдардан кейін тыңдарманына оралу оңай қадам емес екені түсінікті.
«Сахнаға шыққан бойда уайымым сейіліп, тіпті осыншама жылдар сахнадан жырақ болғанымды ұмытып кеттім. Жастық шаққа оралғандай болдым. Бізді жерлестеріміз жылы қарсы алып, шабыттандырды», — деп өз әсерімен бөлісті музыкант. Екі сағатқа созылған концерт ешкімді бей-жай қалдырмады, көрермендер әншілермен бірге ән айтып, би биледі, жастық шақтарын еске алды, тіпті көзіне жас алғандары да болды.
«Күресуге бел буған адамның алдында екі жол болады: жеңу немесе жеңілу. Егер ол оңай берілсе, әрқашан бір ғана нұсқа бар», — деп сенеді Мұрат Жолдасбаев.
Шолпан САБАНОВА
