Жаңа оқу жылының басталуына орай Қордай ауылындағы Орталық алаңда аудан әкімдігінің ұйымдастыруымен «Мектепке жол» республикалық қайырымдылық акциясы аясында кең ауқымды мектеп жәрмеңкесі өтті. Шараның басты мақсаты – аз қамтылған, көпбалалы және әлеуметтік жағынан осал отбасылардың балаларына жаңа оқу жылына дайындық кезінде қолдау көрсету.
Жәрмеңкеге жергілікті 15 кәсіпкер белсене қатысып, тұрғындарға кеңсе тауарларын, оқушы сөмкелерін, мектеп формаларын, аяқ киім мен басқа да оқу құралдарын қолжетімді және жеңілдетілген бағамен ұсынды. Кейбір тауарларға жеңілдіктер мен арнайы акциялар да қарастырылды. Мұндай бастама көптеген ата-аналар үшін үлкен көмек болғаны сөзсіз.
Жәрмеңке барысында жергілікті өнерпаздар концерттік бағдарлама ұсынып, жиналған көпшілікке көтеріңкі көңіл-күй сыйлады.
Аталған шараға аудан әкімдігі тарапынан білім беру, әлеуметтік қорғау, кәсіпкерлік бөлімдері белсене атсалысты. Сонымен қатар, мектеп ұжымдары мен ерікті жастар да жәрмеңке жұмысына қолдау білдірді. Шара аясында бірқатар отбасыға қайырымдылық көмек ретінде мектеп құрал-жабдықтары мен киім-кешек тегін табысталды.
Іс-шара соңында ата-аналар мен қатысушылар ұйымдастырушыларға алғыстарын білдіріп, мұндай игі бастамалардың жалғасын табуына тілектестік білдірді.
«Мектепке жол» акциясы – бұл тек материалдық көмек қана емес, сонымен қатар қоғамдағы қамқорлық пен бірліктің көрінісі. Мұндай бастамалар арқылы әлеуметтік әділеттілік пен ортақ жауапкершілік қағидаттары нығая түсетіні сөзсіз.
