Наурыз мерекесін атап өтудің алтыншы күні — Жаңару күні. Бұл күн көктемгі ағаш отырғызу дәстүріне арналды. Үлкендер тал егу жұмысы арқылы балалардың табиғат-анаға, күллі жаратылысқа деген ықыласын оятып, адам баласының табиғатпен үйлесімді түрде дамитынын ұғындырады. Аталмыш датаға орай, аудан ауқымында атқарылған шараларды назарларыңызға ұсынамыз.
19 Наурыз – Жаңару күні Алға ауылдық округінде тазалық жұмыстары мен көгалдандыру шаралары өтті. Жаңару күніне орай сенбілік ұйымдастырылып ауыл тұрғындары, мекеме қызметкерлері, жастар мен еріктілер белсенді түрде қатысты. Сенбілік барысында ауыл көшелері мен қоғамдық орындар қоқыстан тазартылып ретке келтірілді. Сонымен қатар, ауыл әкімі аппаратының ауласында шырша ағаштары отырғызылып, көгалдандыру жұмыстары іске асырылды. Бұл игі бастама ауылдың экологиялық ахуалын жақсартуға, сондай-ақ, тұрғындардың табиғатқа деген жанашырлығын арттыруға бағытталған.
«Жаңару күні» мерекесі қарсаңында аудандық полиция бөлімі полиция бөлімінің әкімшілік ғимаратының ауласында ағаш отырғызды. Полиция бөлімінің бастығы Асхат Алметов жеке құраммен бірге жаңару, қайта өрлеу және жарқын болашаққа ұмтылыстың нышаны ретінде көгалдандыру акциясына қатысты. Бұл іс-шара еліміз бойынша абаттандыру мен қоршаған ортаны қорғау бастамасының бір бөлігі болды. Жиналғандар алдында сөйлеген алғы сөзінде АПБ бастығы Асхат Алметов табиғатты аялаудың маңыздылығын атап өтіп, отырғызылған ағаштар бірлік пен өркендеудің символына айналады деген сенімін білдірді. Акцияға бөлім қызметкерлері, жіргілікті тұрғындар қатысып қоршаған ортаны аялау және ұлттық дәстүрлерді сақтау жолында бірліктің маңыздылығын көрсетті.
Жаңару күніне орай игі бастама Қарасу ауылында да бой көрсетті. Ауыл тұрғындарының қатысуымен, «Атадан мал қалғанша, тал қалсын» атты ағаш отырғызу акциясы ұйымдастырылып, екі жүз емен ағашы мен қырық шырша отырғызылды. Акция аясында ауыл тұрғындары мен жастары өз ауылдарының көркін арттыруға және қоршаған ортаны таза ұстауға өз үлестерін қосты. Бұл бастама ауылдың табиғи экожүйесін жақсартуға, ауа сапасын арттыруға және табиғатты қорғау мәдениетін қалыптастыруға бағытталған. Аталған шара жергілікті тұрғындардың ауызбіршілігін нығайтып, келер ұрпаққа табиғатты қорғаудың маңыздылығын көрсетуге ықпал етті.
«Атадан мал қалғанша, тал қалсын» атты ағаш отырғызу акциясы Сарыбұлақ ауылында да көрініс тапты. 19-наурыз Жаңару күні қарсаңында ауыл тұрғындарының қатысуымен ағаш отырғызу шарасы ұйымдастырылды. Аталған акция аясында ауыл тұрғындары мен белсенді жастар жеміс және сәндік ағаштар отырғызып, елді мекеннің көркін арттыруға бір кісідей атсалысты.
Көктемнің келуімен табиғат жаңарып, адамзат баласы жаңа өмірге қадам басады. Осы орайда, «Жастар ресурстық орталығы» коммуналдық мемлекеттік мекемесінің ұжымы табиғатқа жанашырлық танытып, ағаш отырғызу акциясын өткізді. Әрбір отырғызылған тал болашаққа ұрпаққа қалдырар мұра ретінде, қоршаған ортаны қорғаудың нақты қадамы саналады. Мұндай бастамалар келешек ұрпақтың санасын көтеріп, табиғатқа деген сүйіспеншілігін арттырары сөзсіз.
