Жамбыл облысында бір аптаға созылған Қазақстан мен Қырғызстан Қарулы Күштерінің «Дала сұңқары-2024» бірлескен тактикалық оқу-жаттығуы аяқталды.
Оқу-жаттығудың соңғы кезеңіне «Оңтүстік» өңірлік қолбасшылығының қолбасшысы генерал-майор Қуанышбек Үштаев пен Қырғыз Республикасы Қарулы Күштері Бас штабының өкілі полковник Әділ Кеңес улу қатысты.
«Оқу-жаттығу тактикалық эпизодпен аяқталды. Жаттығу барысында Қазақстан мен Қырғызстан әскери қызметшілерінің аралас контингенті имитацияланған жаудың базалық ауданында өрт рейдін жүргізіп, оны жойды. Бұл оқу-жаттығуды ұйымдастырмас бұрын екі елдің әскери қызметшілері он күн бойы практикалық жаттығулар өткізіп, өздерінің кәсіби дағдыларын шыңдады. Біріккен топтарда олар имитацияланған жаудың базалық лагерін анықтау үшін Талас жотасының бүкіл таулы аймағын аралап шықты. Таулы аймақта тапсырмаларды орындай отырып, топтар қадағалап отыру өнерін пайдаланып, қарсыласты таң қалдыратындай етіп маневр жасады», – дейді «Оңтүстік» өңірлік қолбасшылығы барлау бөлімінің бастығы полковник Ербол Серғазин.
Полкониктің айтуынша, біздің жауынгерлеріміз де, Қырғызстанның Қарулы Күштері де, жалпы құрама бөлімдер белгіленген жауынгерлік оқу-жаттығу тапсырмалары мен жүктелген міндеттерді толығымен орындап шыққан.
Оқу-жаттығуға Қазақстаннан тау қорықшылар полкімен қатар, Әскери-әуе күштерінің өкілдері де қатысқан. Сондай-ақ, бұл жиынға Шымкент авиабазасының ұшқыштары мен Тараз ұшқышсыз ұшу жүйелерін жауынгерлік пайдалану орталығының операторлары да атсалысқан.
«Бұл оқу-жаттығудың негізгі мақсаттары мен міндеттері, біріншіден, мемлекеттеріміз бен Қарулы Күштер арасында достық қарым-қатынас орнату, екіншіден тәжірибе алмасу болды. Екі мемлекеттің Қарулы Күштері біздің тұтастығымызды, аумақтарымыз бен шекараларымыздың тұтастығын сақтау үшін қолдан келгеннің бәрін жасауы тиіс», – деп атап өтті Оңтүстік өңірлік қолбасшылығының қолбасшысы генерал-майор Қуанышбек Үштаев.
Оқу-жаттығудың соңында екі тарап өзара естелік сыйлықтармен алмасып, үздік нәтиже көрсеткен әскерилер арнайы Алғыс хаттармен марапатталды.
«Қырғыз Республикасы Қарулы Күштері басшылығының атынан Қазақстан Қарулы Күштерінің, әсіресе «Оңтүстік» өңірлік қолбасшылығының басшылығына «Дала сұнқары-2024» бірлескен тактикалық арнайы оқу-жаттығуын ұйымдастырғаны және өткізгені үшін алғысымды білдіргім келеді. Бұл оқу-жаттығу халықаралық терроризм мен экстремизм көрінісімен күресуге мүмкіндік береді. Оқу-жаттығуға қатысушылар үлкен тәжірибе жинады, өзара байланыс нығая түсті деп есептеймін», – деді Қырғыз Республикасы Қарулы Күштері Бас штабының өкілі полковник Әділ Кеңес улу.
Оқу-жаттығудың жабылу салтанатында қырғыз тарапы сонымен қатар, тау-кен қазылар полкінің командирі подполковник Алмас Отыншиновқа айрықша алғыстарын білдірді.
«ҚазАқпарат»
