Берекесі жарасқан, айналасына жылу мен мейірім шашқан отбасылар қай кезде де көпке үлгі. Осындай өнегелі шаңырақтардың бірі – Қызылсай ауылының сыйлы тұрғындары, 54 жыл отасқан Айдархан Әбдікерімов пен Мейрамкүл Әбдікерімованың отбасы.
Айдархан ата өзінің бүкіл ғұмырын адал еңбекке арнаған жан. Ол «Трудовик» колхозында 40 жылдан астам трактор жүргізушісі болып қызмет етсе, Мейрамкүл апа сол колхоздың қызылша алқабында тер төкті. 1981 жылы ауылдағы медициналық-ветеринарлық кешенде санитар болып жұмыс істеп, кейін 1993 жылы пошташы қызметіне ауысты. 18 жыл бойы ауыл тұрғындарының хат-хабарын үзбей жеткізіп, 2011 жылы құрметті еңбек демалысына шықты. Бүгінде олар – төрт перзентінен тараған 13 немере мен 10 шөберенің қызығына бөленіп отырған ардақты ата-әже.
«Жарты ғасырдан астам уақыт бір шаңырақ астында өмір сүрудің сыры неде?» деген сұрағымызға Мейрамкүл апа шынайы күлкімен жауап берді:
– Әрине, өмір болған соң түрлі қиындықтар, ұсақ-түйек тұрмыстық мәселелер болмай тұрмайды. Бірақ жастайымнан отбасы құндылықтарының негізі – сыйластық, сенім және шыдамдылық екенін түсіндім. Жасым 70-тен асса да, әлі күнге отағасын жақсы көремін, сыйлаймын. Ең бастысы – уақытша қиындықтарға берілмеу. Нағыз бақыт – бір-біріне сүйеніш болып, өмірдің әр сәтін бірге өткеру, – дейді Мейрамкүл Сағадиқызы.
Айдархан ата да отбасының беріктігін сақтаудың қарапайым, бірақ аса маңызды қағидаларын атап өтті:
– Жарасымды отбасына ең керегі – сыйластық, бірлік және еңбек. Адал еңбек еткен адамның өмірі жарқын болады. Балаларға да әрдайым айтып отырамын: тынымсыз еңбек етіңдер, ізденісте болыңдар, алға ұмтылыңдар, – дейді шаңырақ иесі.
Қазақтың салт-дәстүрінен нәр алып, жанұя шаттығын дамыта білген Айдархан ата мен Мейрамкүл апа ұл-қыздарына саналы тәрбие беріп, өсіріп-жетілдіріп, бүгінде әрқайсысы бір үйдің түтінінін түтетіп отыр. Ұлдары Саматтың жекеменшік кәсібі бар, қыздары да бір-бір мамандық иесі атанып отыр.
Әңгіме барысында ата-әжемізден «Бір-біріңізге қандай қасиеттеріңіз үшін алғыс айтар едіңіздер?» деп сұрадық.
– Отағасы өте кешірімді, сабырлы, бәріне түсіністікпен қарайды. 50 жыл ішінде оның ешқандай жаман қасиетін есіме де түсіре алмадым, – деп Мейрамкүл апа күлімсірей жауап берді.
Ал Айдархан ата жұбайының даналығын, төзімділігін ерекше бағалайтынын айтты.
– Адам өмірінде жар таңдаудан асқан маңызды қадам жоқ. Мен өз жарымды дұрыс таңдадым деп мақтанышпен айта аламын. Бізге қарап, балаларымыз бен немерелеріміз де бақытты ғұмыр кешсін деп тілеймін. Ұрпағымыз аман, еліміз тыныш болсын! – деп ата-әжеміз әңгімесін ақ батамен аяқтады.
Айдархан ата мен Мейрамкүл апаның өмір жолы – еңбекпен өрнектелген, мейіріммен көмкерілген өнегелі ғұмыр. Жарты ғасырдан астам уақыт бойы бір-біріне сүйеу болып, үлкен бір әулеттің тұтқасын ұстаған бұл отбасы – тек Қызылсай ауылының ғана емес, барша қазақ жұртының берекелі отбасы болудың жарқын үлгісі. Қазіргі жастарға үлгі боларлық осындай шаңырақтар көп болғай!
