Қазақстанда жыл сайынғы халықаралық науқан – «Зорлық-зомбылықсыз 16 күн» басталды. Акция 25 қараша мен 10 желтоқсан аралығында өтеді.
Іс-шара ҚР Президенті жанындағы Ұлттық комиссия мен Мәдениет және ақпарат министрлігінің қолдауымен ұйымдастырылып келеді. Оның негізгі мақсаты – тұрмыстық зорлық-зомбылықты алдын алу және халықтың құқықтық сауаттылығын арттыру.
Жамбыл облысында тұрмыстық зорлық-зомбылықтан зәбір көрген әйелдерге арналған арнайы екі бірдей Дағдарыс орталығы жұмыс істейді. Бірі – Тараз қаласында, енді бірі – Қордай ауданында орналасқан.
Өкінішке қарай, аталған орталықтың қызметіне жүгінетін жамбылдық нәзік жандылардың қатары жыл сайын артып келеді. Бұл туралы Өңірлік коммуникациялар алаңында өткен брифинг барысында «Жамбыл облыстық тұрмыстық зорлық-зомбылық құрбандарына әлеуметтік көмек көрсету орталығы» коммуналдық мемлекеттік мекемесінің директоры Айдана Биғабылова мәлімдеді.
Жамбыл облысы әкімдігінің жұмыспен қамтуды үйлестіру және әлеуметтік бағдарламалар басқармасына қарасты орталықтың жетекшісі БАҚ өкілдеріне көп жағдайда әйелдер ұзақ уақыт физикалық, психологиялық немесе экономикалық қысым көргеннен кейін ғана көмек сұрайтынын айтты.
«Өткен жылы бізге 71 әйел жүгінсе, биыл – 70 әйел келді. Жыл басынан бері 356 адамға консультация бердік. Зорлық-зомбылықтың салдары ең алдымен балаларға тиеді. Бізге келген әйелдердің барлығында кәмелетке толмаған балалары бар. Жыл сайын біздің орталықта шамамен 280 адам көмек алады. Мәселен, 2025 жылы зорлыққа ұшыраған отбасындағы әйелдердің 58-нің білімі орта, 22-сі көп балалы, 58-і жұмыссыз, 35-і ауылдық жерде тұрады. Бұл деректер мәселенің әлеуметтік сипатын айқын көрсетіп отыр», – деді Айдана Сатылғанқызы.
