Құрылтай сайлауы өткен соң, 145 депутат заң шығарушы органға 5 жылға жайғасады. Жаңа заңдар, жаңа бастамалар көтереді. Бұрын айтылып, алайда тарих қойнауына кеткен Мәжіліс пен Сенат шешуге үлгермей қалған кей мәселені жаңа депутаттар шешуге тырысады. Ол түсінікті жайт. Дегенмен кез-келген тәжірибе көрсеткендей, кез-келген реформаны, заңды, бағдарламаны кәсіби мамандар жүзеге асырады. Осы ретте партиялар ұсынған кандидаттардың кәсіби болуы маңызды.
Барлық партия өз кандидаттарын ұсынды. Тіркеуден өтіп жатыр. Бүгін «Әділет» партиясының кандидаттары тіркеуден өтіпті. Олар 10-шілдеде тізімді ұсынды және 186 кандидаттың есімін жариялады. Бұл ең үлкен тізім болды. Оның ішінде түрлі саланың мамандары бар. Кәсіпкер, заңгер, журналист, саясаттанушы және басқа дегендей.
Партия институционалдық тәжірибесі мол мамандардың шоғырын жасауға тырыстық дейді. Мемлекеттік басқару саласында еңбек еткен 27 кандидат пен заң шығару қызметінде тәжірибесі бар 22 кандидатты тізімге қосыпты. Бұлар мемлекеттік шешімдердің қалай қабылданатынын, бюджеттің қалай қалыптасатынын, заңдардың қалай әзірленіп, қалай орындалатынын жіті білетін адамдар ғой.
Қазіргі таңда елдің алдында тұрған негізгі міндеттердің бірі – экономиканы әртараптандыру, кәсіпкерлікті қолдау, цифрлық трансформацияны жалғастыру және мемлекеттік басқарудың тиімділігін арттыру. Бұл мәселе жиі айтылуда. Бұл міндеттердің әрқайсысы заңнамалық өзгерістерді де, әкімшілік шешімдерді де қатар талап етеді. Сондықтан мұндай міндетті жүзеге асыру үшін мемлекеттік жүйенің ішкі логикасын терең түсінетін мамандардың болуы маңызды факторға айналады. Сол үшін де партия жоғарыда айтылған азаматтарды өз тізіміне қосты деуге болады.
