Қордайлық спортшы Қамбар Кокомбаев Біріккен Араб Әмірліктерінің астанасы Абу-Даби қалсында өткен Джиу-Джитсудан әлем чемпионатында II орын иеленді.
JJIF халықаралық джиу-джитсу федерациясының рейтингінде жоғары орында тұрған жерлесіміз 94кг салмақта өнер көрсетіп, қарсыластарын айқын басымдықпен жеңіп, жүлделі орынға көтерілді.
Беделді халықаралық доданың өзіне әлемнің көптеген елдерінен таңдаулы спортшылар қатысып, жоғары деңгейдегі бәсекелестік жағдайында шеберліктерін көрсетті.
Осы жарыста намысты қолдан бермеген Қамбар жеңіс туын желбіретіп қайтты. Abu Dhabi World Amateur Jiu-Jitsu Championship жарысында кіл мықтылардың арасынан оза шауып, ел намысын абыроймен қорғаған азамат қандай мадаққа да лайық.
Қамбар Орынбасарұлының алдағы уақытта да ірі халықаралық бәсекелерде жарқырап, еліміздің көк Туын биікте желбірете беретініне сенім мол.
Айта кетсек, Джиу-джитсу — бүгінде әлем бойынша кең тараған жекпе-жек спорты. Бұл спорт: қарсыласты тұншықтыру, буынға алу, лақтыру және позициялық бақылау әдістеріне негізделеді, спортшының техникасы, төзімділігі, тактикалық ойлауы ерекше маңызды. Әлем бойынша AJP, JJIF секілді ірі ұйымдардың қолдауымен спортшылар кәсіби деңгейде дамып келеді.
