КАРАТЭДЕН АШЫҚ ТУРНИР
4 мамыр күні Қордай ауылындағы спорт кешенінде «Amanat» партиясы аудандық филиалының ұйымдастыруымен «Бақытты отбасы» партиялық жобасы аясында балалар, ұлдар және қыздар арасында шинкиокушин фул-контакт каратэден ашық турнир өтті.
Жарыстың басты мақсаты – жасөспірімдер арасында салауатты өмір салтын насихаттау, спортқа қызығушылықты арттыру және тәжірибе алмасуға мүмкіндік жасау.
Турнирге Қазақстанның түрлі өңірлерінен және Қырғыз Республикасынан 10 команда, жалпы 154 спортшы қатысты. Атап айтқанда Алматы қаласы мен Алматы облысы, Қаскелең, Талғар, Қызылорда, Тараз, Мерке, Қордай, сондай-ақ Бішкек, Қара-Балта және Тоқмақ қалаларының жас спортшылары бақ сынады.
Ашылу салтанатында «Amanat» партиясы Қордай аудандық филиалының төрағасы Бейқұт Жамангозов құттықтау сөз сөйлеп, спорттың жас ұрпақ тәрбиесіндегі маңызын атап өтті. Сонымен қатар бірқатар жаттықтырушыларға құрмет көрсетіліп, алғыс хаттар табысталды.
Жарыс қорытындысы бойынша командалық есепте Қаскелең қаласының командасы бірінші орынды иеленді, екінші орын Бішкек қаласына бұйырса, үшінші орынды Қордай ауданының спортшылары жеңіп алды.
